Cemîl Bayik: Zap do înan rê bibo gor

Hemserekê Konseya Rayberdişî ya KCKyî Cemîl Bayikî venga şaranê Kurdîstan, Tirkîya û herême da ke wa wayîrê xoverdayîşê Zapî vejîyê û vat: ''Zap do înan rê bibo gor, îqtîdarê AKP-MHPyî do birijîyo. Wa her kes hesabê xo goreyê ney bikero.''

Hemserekê Konseya Rayberdişî ya KCKyî Cemîl Bayikî Bernameyê Taybetî yê Stêrk TVyî de cewab da persan û tecrîdê vera Rayberê Şarê Kurdî Abdullah Ocalanî, şerê Zapî û hemkarîya PDKyî ercnayî.

Qiseykerdişê Bayikî ra beşêk wina yo:

''Nika vera Rayber Apoyî sîyasetê qesasî yeno kerdene. Hînî dewlete pê bahaneya cezaya dîsîplînî pêvînayîşanê bi Rayberîye asteng kena. Bi nê hawayî tecrîdê vera Rayberîye kenê mende. Na polîtîka vera pêro kurdan û merdiman a. Dewleta tirke seba ke zanena Ewropa bi 'heqê hêvîye' tedaya ci do bikera pê nê cezayanê dîsîplînî kena ke verê veradîyayîşê Rayber Apoyî bigêra. Hetê bînî ra dewleta tirke seba ke Zap û Avaşîn de nêeşkena ser bikewa Rayber Apoyî ra bi rayîrê tecrîdî qesasê ney gêna. Ganî her kes vera ney hem warê polîtîkî de hem zî warê leşkerî de têkoşîn bikero.

Ewro dewlete pêro zîndanan de tecrîdê Îmraliyî vila kerdo. Dewlete bi rayîrê zîndanan wazena îradeyê kurdan bişikna. Her roje zîndanan ra cenazayî vejîyenê. Yanî îdam zîndanan de yeno caardene. Dewlete embazanê zîndanan rê teslîmîyet ferz kena, nêverdena tepişteyê nêweşî tedawî bibê. Ez Nobeta Edaletî yê Keyeyan selam kena. Ganî pêro kurdî wayîrê tepişteyan vejîyê. Wa embazê ma yê zîndanan qetî polîtîkayanê dişmenî qebul mekerê û xeta şehîdan û Rayber Apoyî de têkoşîn bikerê.

Şerê vera Zap û Avaşînî a raşte 14 yan zî 17ê nîsane de nê 26ê tebaxa 2016î de dest pêkerd. Wexto ke Tirkîya kewte Cerablus Biden û Mesûd Barzanî Anqara de bîyî. Yanî PDK, dewleta tirke û Amerîka pîya bire daye. Yanî şerê Zap û Avaşînî de ma vera NATOyî şer kenê. Tirkîya bê hetkarîya NATOyî nêeşkayêne nê şerî bikera. Şerê Zap û Avaşînî şerêko pîl o. Dewleta tirke û îqtîdarê AKP-MHPyî seba ke ser bikewê û xo mende bikerê pêro îmkanê xo nê şerî rê pêşkêş kerdî. Dişmen armanc keno ke nê şerî reyde PKKyî tasfîye bikero û qirkerdişê kurdan temam bikero. Şerê Zapî têna şerê kurdan yan zî ê PKKyî nîyo nê şehîdî zî têna şehîdê şarê kurdî nîyê. Şehîdê şaranê Kurdîstan, Tirkîya û herême yê. Tirkîya de bingeyê pêro meseleyan de polîtîkayê Bahçelî-Erdoganî û qirkerdişê kurdan est ê.

PKK seba pêro şaran têkoşîn keno, bedelan û şehîdan dano. Ganî her kes wayîrê nê şehîdan vejîyê. La PKK perwerê şarê kurdî yo. Eke PKK derbe biwero, kurdî zî wenê. Eke şarê kurdî derbe biwero pêro şarê herême derbe wenê. Dişmen Zap de pê cergan, qoricîyan şer keno. Gerîlayê HPG û YJA-Starî vera nînan bi çêrî şer kenê. Gerîlayan planê îşxalî yê dewlete pûç kerdî. Zap de nika ê nêeşkenê netîceyêke bigêrê. Zap do bibo gorê înan, AKP-MHP do Zap de bin bikewo. Wa her kes ney bivîno û goreyê ney hesabanê xo bikero. Şerê Zapî do qederê ma û ê îqtîdarî eşkera bikero.

Gerîla û fermandarê HPG û YJA-Starî vera dişmenî têkoşînêkê çêrî kenê. Dişmen pê bombardumanan û çeka kîmyewîye hêrişê gerîlayan keno la reyna zî o derbe weno. Qerargehê HPGyî zî vat ke 500 ra zêdêr kişteyê dewlete est ê. Gerîlayî bi terzêkê neweyî şer kenê. Verî gerîlayan vera hêrişan cayê xo teriknayêne û cayêkê bînî de şer kerdêne. Nika gerîlayî cayê xo nêteriknenê. Şero nikayên şerê têzere yo. Dewleta tirke verê çimanê dinya de çeka kîmyewîye şuxilnena la çew ney rê vengê xo nêkeno. Peyê nê şerî de Amerîka, Îngilîstan, Almanya, PDK est ê. Coka ma vanê NATO mîyanê nê şerî de yo. No şer beno ke verê parçebîyayîşê Iraqî abikero. Coka ganî roşnvîr, partî, nuştox û hêzê Iraqî vera nê şerî vengê xo bikerê. Ganî şarê erebî şarê kurdî û PKKyî reyde têkoşîn bikero.

PDK pê zûran û xeberanê provakasyonî keno ke şarê ma bixapîno. PDKyî dest na maskeyanê gazî yê gerîlayan ser ke wa pêro pê çeka kîmyewîye bimirê. PDK bi nê kerdişanê xo xizmetê dewleta tirke keno. PDK ganî nê sîyasetî ra fek vera bido. Ma vat ke ganî şarê kurdî yewîya xo rono. Rixmê vengdayîşê ma zî PDKyî hetê dewleta tirke de ca girewt. PDKyî bi nê hawayî hûrmetê verê xo qedîna. PDK zerar dano şarê kurdî. Tirkîya bi serran xîret kerd ke PKKyî biqedîna la nêeşkaye. PDK zî do nêeşko ney bikero. Ma nêvanê îlahîm PDK wa hetkarîya ma bikero. Eke hetkarî bikero xora hol beno. La PDK xizmetê dewleta tirke nêkero ma rê bes o.

Ez keyeyê embaz Mehmet Zekî Çelîkî rê serweşîye wazena. Embaz Zekîyî verî eşkera kerdbi ke MÎT û Parastinî o tehdît kerdo. Pê nê suîkast û hêrişan no mesaj yeno dayene: Başûrê Kurdîstanî de aramîye çin a, eke şima welatperwerîye de israr bikerê, do nêeşkê biciwîyê. Ganî vera nê sîyasetê dewleta tirke welatperwerê vakurijê ke Başûr de ca bîyê, apey game nêerzê. Wa nuştox, roşnvîr, sîyasetmedar, hêz û şarê Başûrî nê kerdişan hol bivînê û meverdê ke PDK Tirkîya rê ardim bikerê. Ewro PKK û Rayber Apo seba şarê kurdî têkoşîn kenê, nêverdenê şarê kurdî wa çin bibo û Kurdîstanî bikewo destê dişmenan. Eke ma ewro PKKyî mepawê key pawenê? Ganî şarê Başûrî nê tehlukeyo ke pê destê PDKyî vila beno, bivîno û vera sîyasetê PDKyî vejîyo.''