Bi rayberîya Komuna Enternasyonalîst a Rojawanî, xeylî welatanê Ewropa ra ciwanî çarçewaya projeyê "Make Rojava Green Again" (Rojawa newe ra zergûn bike) de ameyî têhet. Ciwanan bajarê Cenevre yê Swîsî de kampêk 2 rojan viraşte.

Seba Rojawanî Ameyî Têhet

Komuna Enternasyonalîst a Rojawanî, bi cehdkerdişê xo yê seba afernayîşê wareyanê neweyan ê cuye ya Rojawanî, hetkarîye dana ramitişê daran ê Rojawanî û xebatanê seba kooperatîfê ekolojî.

 Kombîyayîşê di rojan de, derheqê xebatanê ke seba Rojawanî ganî bêrê kerdene de munaqeşeyî ameyî kerdene.

Ganî Paştdayîş Bêro Xurtkerdene

Ciwanê enternasyonalîstî kombîyayîşî ra dima şîyî serdana Mehmet Alî Koçakî, ke seba wedaritişê tecrîdkerdişê Rayberê Şarê Kurdî Abdullah Ocalanî 54 rojî yo Merkezê Cimatê Demokratîkê Kurdan ê Cenevre de grevê vêşanîye yê bêdem û bêagêrayîşî de yo.

Ciwanan derheqê grevê vêşanîye de Koçakî ra zanayîşî girewtî û ard ziwan ke tecrîdkerdişê Ocalano ke serkêşê Şarişê Rojawanî yo, nêno qebûlkerdene. Ciwanan da zanayene, fikrê Ocalanî teyna seba Kurdan ney, seba heme cimatan zaf muhîm ê û seba wedaritişê tecrîdî bale ante serê muhîmîya afernayîşê rayapêroyî ya mîyanneteweyîye.

Ciwanan da zanayene ke ê do paştdayîş bidê xoverdayîşê grevê vêşanîye, paşdayîşî xurt bikerê û vengdayîş bi cimatê mîyanneteweyî kerd ke hîratir bala xo bido serê na babete.

Koçak: Ruhê Yewîye do Tecrîdî mîyan ra Wedaro

Koçakî keyfweşîya xo bi serdana ciwanan arde ziwan û vat, “Nê paştdayîşî hêz û moral danê ma. Ma pê bawer ê ke nê paştdayîşî û ruhê yewîye do tecrîdî biqedênê. O yo ke ewro ma dorê eynî amancî de resnayê pê, ruh û paradîgmaya Rayberê ma ya."

Hetê bînî ra, mîyanê eynî roje de grubêk endamanê PYD’yî ra şîybî serdana Koçakî.