Destsernayîşê Şaredarîyanê Dêrsim û Pulirî xeylê şaristanan de bi çalakîyan ame şermazarkerdene. Çalakîyan de seba pîlkerdişê xoverdayîşî veng dîya.

Dêrsim de Meydanê Seyîd Rizayî de nobeta vera xespkerdişî dewam kenê. Xeylê kesî nobete zîyaret kenê. Hemşaredara Wanî Neslîhane Şedal zî seba paştdayîşî şîye Dêrsimî û vat: Dêrsim xoverdayîş û serewedaritiş o. Heta ke qeyûmî şorê ma do têkoşînî rê dewam bikerê''

Konya de verê Rêxistina DEM Partî de kombîyayîşê çapemenîye ame kerdene. Tîya de Hemserekê DEM PArtî yê Konya Mulla Şîmşekî kombîyayîş de vat ke polîtîkayê qeyûmî hêrişê erjanê kurdan kenê. 

Qers de DEM PArtî û TJA eşkerayîye daye. Wextê eşkerayîye de pankarta 'Qeyûm darbe ya, dest medê îradeyê ma' ameye akerdene. Îdarekarê DEM Partî yê Qersî Serdar Aydinî tîya de vat: ''Vera darbeya qeyûmî ma do îradeyê şarî bipawê. Dêrsim hetê şarî ra do bêro îdarekerdene.''

Agirî de rêxistinanê DEM û DBPyî TJA reyde eşkerayîye daye. Eşkerayîye de pankarta 'ŞAredarîyî ê ma yê, ma do nêverdê şima xesp bikerê' ameye akerdene. Hemserekê DBPyî yê Agirî Hîkmet Adiguzelî eşkerayîye wende û vat: ''Qeyûmî do şorê, îradeyê şarî do bimano. Ma venga hêzanê demokrasîyî danê ke vera darbeya qeyûmî ma pîya têkoşîn bikerê.''