Menga Adare de QSD’yî bi hamleya “Vagerê Cizîre”, Baxoz destê DAÎŞ’î ra girewt û Surîye de hukmê DAÎŞ’î qedêna.

Sey cayanê binan Baxoz de zî xeylî DAÎŞ’ijî esîr ameyî girewtene û dest nîya pasaportanê înan ser. Kovara Almanya ya namdare Der Spîegel û Spîegel TV’yî bale ante pasaportanê DAÎŞ’ijan ser.

Der Spîegelî xebera xo de va Tirkîya seba derbazbîyayîşê DAÎŞ’ijan welatêko bêemsal a û wayîrê pasaportan Almanya, Rûsya, Endonezya û Tûnis ra, Trînîdad, Efrîqaya Başûre, Slovenga û Tabogo ra derbazê Tirkîya bîyê û uca ra beşdarê DAÎŞ’î bîyê.

Tewr kêmî yew dolime şîyê Tirkîya

Pêro pasaportan de morê cikewtişê Tirkîya esto û her DAÎŞ’ij tewr kêmî yew dolime kewto Tirkîya. Çîyo tewr muhîm o yo ke, DAÎŞ’ijî tewr peyî şîyê Tirkîya. No zî musneno ke Tirkîya seba derbazbîyayîşê DAÎŞ’ijan welatêko bêemsal o.

Reyna qaso ke moranê serê pasaportan ra yeno fehmkerdene, DAÎŞ’ijî Surîye ra zî derbazê Tirkîya bîyê û uca ra reyna derbazê welatanê bînan bîyê.