Bajarê Strasbourgî yê Fransa de 1ê kanûne de Înîsîyatîfê Ocalanî rê Azadîye bi şîarê 'Azadîye do ser bikewo-semedê Ocalanî têbigêrê' çalakîye dayebî destpêkerdene. Çalakîye hewteyê diyînînî de dewam kena.

Sîyasetmedaranê kurdan û endamanê Yewîya Hêzî ya Demokratîke yê ke çalakîye dewr girewte eşkerayîyêke daye. Eşkerayîye de bale ameye antene polîtîkaya hêrişkare ya dewleta tirke ya vera şarê kurdî ser û nê ameyî vatene:  ''Kurdîstan de sûcê şerî û merdimîye yenê kerdene. Tecrîdê serê Rayberê Şarê Kurdî Abdullah Ocalanî sey leteyêkê şerî xorî beno. Semedê vergirewtişê şerî ganî tecrîd bêro wedaritene. Tirkîya endama Konseya Ewropa ya coka berpirsîyarîya înan zî esta. Erdogan ercanê Konseya Ewropa, Mehkemeya Heqanê Merdiman a Ewropa û CPTyî binpay keno.  Ma tîya ra veng danê ke wa wayîrê ercanê xo vejîyê. Hêrişê îşxalî yê dewleta tirke yê vera Başûr û Rojawanê Kurdîstanî dewam kenê û vera gerîlayan çekê kîmyewîyî yenê şuxulnayene. Coka ma veng danê Konseya Ewropa; goş bidê Abdullah Ocalanî. Abdullah Ocalan semedê ma şansêko muşterek o. Ewropa ganî polîtîkaya xo ya bi Tirkîya bibedilno. Heta waştişê ma bêrê ca çalakîya ma do dewam bikero.''

Hetê bînî ra bi nameyê çalakwanan heyetêk derheqê tecrîdî de dosyayêke teslîmê CPTyî kerde.