19ê teşrîna verêne ya 2019î de şaristanê Kolnî yê Almanya de rayberîya xeylêk komanê çepgîran ê Almanya  û rêxistinan de bi şîarê 'Ganî hêrişê îşxalî yê Tirkîya bêrê vindarnayene û paştî bidê Rojawanî' çalakîyêka şermezarkerdişî amebî kerdene.

Partîya raştgîre ya radîkale AfD ra ber pêro partîyanê Almanya paştî dabî çalakîye. Çalakîye de amebî waştene ke îşxalê Girê Sipî û Serêkanîyê bêro vindarnayene. Labelê çalakîye ra verî di amîranê polîsan ê Mudirîya Asayîşî eşkerayîyê provakatîfî dabî.

Mudirê Asayîşî yê Kolnî Uwe Jacobî û amîrê polîsan ê çalakîye ra mesuldar Klaus Ruschenschmidt 18ê teşrîna verêne ya 2019î de kombîyayîşê çapemenîye de vatbi: ''Goreyê agahîyanê ke ma eşnawitê do nêzdîyê hezar kurdî pê çeke û kardî tewrê çalakîye bibê.''

Wird amîran îdîa kerd ke kurdî do hêrişê dormeyî bikerê û waşt ke çalakîye bêra qedexekerdene. 

Dima ke çalakîye bi haştîyane qedîyaye dezgehê bi nameyê Interventionistische Linke (Çepo Têkoşer) tewiro provakatîf ê wird amîranê polîsan berd mehkeme. Dezgehî ard ziwan ke bê delîlî kurdî ameyî hedefkerdene û paştdayîşê bi Rojawanî ame krîmînalîzekerdene.

Roniştişo verên ê dewaya vera wird amîran ewro Mehkemeya Îdare ya Kolnî de do dest pêbikera.