Grevê vêşanîye yê Strasbourgî yê 14 xoverdayoxan ê bi waştişê wedaritişê tecrîdê serê Rayberê Şarê Kurdî Abdullah Ocalanî roja 131’ine dewam keno.

Texrîbatê serê organan beno ke bibo sebebê merdişî

Her ke şono rewşa weşîye ya çalakwanan kewena rewşêka birîske. Dr. Fahrettîn Guneşo ke destpêkê grevê vêşanîye ra nata rewşa çalakwanan teqîp keno, ard ziwan ke eke wextêko kilm de çareserîye nêra dîyayene, texrîbato ke heta nika organanê çalakwanan de virazîyo, eşkeno bibo sebebê komplîkasyonanê muhîman û  heta no rayîrê merdişî zî akeno.

Gulşenî da zanayene ke persê sîstemîk û norolojîkî ke naye ra ver çakalwanan de tespît kerdibi ameyî rewşêka winîye ke êdî cuya çalakwanan tehdît kenê û vat, tayê persê ke zerrî, velke û pişikan de ameyê dîyayene, ê do xeter bibê. Dr. Gulşenî vat, rîyê krîzê zerrî ra, kêmbîyayîşê velikan ra, enfeksîyon pişike de qewemîyeno.

Nêmeyê çalakwanan de yenê dîyayene

Dr. Gulşenî da zanayene, nê persî heta nika 3 çalakwanan de ameyî dîyayene, nika nê persî 7 çalakwanan de ameyî tespîtkerdene û nê dîyarîyî tewr zêde Yuksel Koç, Kerem Solhan û Gulîstan Îke de giran ê.

Dr. Gulşenî ard ziwan ke çalakwananê bînan de hîna zêde persê norolojîkî estê, vera veng, roşnîye, boye rê zêde hesasbîyayîş û dejê giran ê masûlkeyan û persêka bêhewnîye esta. Gulşenî vat, nê komplîkasyonî benê ke bibê sebebê merdişê çalakwanan.

Kurdan, rayapêroyîye û muxataban rê vengdayîşê hîsgêrîye

Dr. Gulşenî vat persê ke înan nêweşan de tespît kerde her game beno ke netîceyanê xeternakan do abikerê, na babete de ganî sazgehê Ewropa yê ke hem rayapêroyî û hem zî çalakwananê grevê vêşanîye ê kerdê muxatab, ganî bikewê mîyanê têgêrayîşî.

Gulşenî ard ziwan seba çalakwananê grevê vêşanîye faktoro tewr muhîm “moral” o û moralê çalakwanan zaf baş o. Labelê tewirê sazgehanê Ewropa yê vera grevê vêşanîye  têsîrêkê xirab înan ser o keno û vat, zaf muhîm o ke waştişê merdimî yê çalakwanan berê caardene.

Dr. Gulşenî vengdayîş bi sazgehanê weşîye yê Fransa û welatanê bînan kerd  û waşt ke rewşa çalakwanan ca de bêrê dîyayene.