Ewropa de 1’ê Gulane bicoş ame pîrozkerdene
Kurdistanijê ke xeylî merkezanê Ewropa de tewrê şayîyanê 1’ê Gulane bîyî xoverdayîşê grevê vêşanîye û rojeyê mergî silam kerd.
Kurdistanijê ke xeylî merkezanê Ewropa de tewrê şayîyanê 1’ê Gulane bîyî xoverdayîşê grevê vêşanîye û rojeyê mergî silam kerd.
Bi wesîleya Roşanê Kede û Paştdayîşî yê 1’ê Gulane xeylî bajaranê Ewropa de rayraşîyayîşî ameyî organîzekerdene.
Rotterdam
Bajarê Rotterdamî yê Hollanda de hetê dezgehanê çep û sosyalîstan ê Hollanda, Tirkîya û Kurdistanijan ra çalakîyêk ameye organîzekerdene. Kurdan rayraşîyayîşî de bale ante xoverdayîşê grevê vêşanîye ser.
Stuttgart
Bajarê Stuttgartî yê Almanya de zî Kurdistanijî pîya bi hezaran sendîka û partîyanê Almanan rayra şîyî. Dima ra zî tewrê aktîvîteya ke hetê Merkezê Cimatê Kurdan o Demokratîk ra ameye organîzekerdene bîyî. Aktîvîte de parlementero verên ê HDP’yî yê Mûşî Ahmet Yildirimî qisey kerd. Yildirimî bale ante muhîmîya yewbîyayîş û xoverdayîşî ser û va,‘‘ Eke Kurdê Ewropa rolê xo hol kay bikerê, ma do ser bikewê.‘‘
Ulm
Bajarê Ulmî de zî Kurdistanijî tewrê şayîya 1’ê Gulane bîyî û bale ante xoverdayîşê grevê vêşanîye û rojeyê mergî yê ke semedê wedartiş tecrîdê serê Rayberê Şarê Kurdî Abdullah Ocalanî yenê viraştene.
Kassel
Bajarê Kasselî de zî Kurdistanijî roja kedkar û karkeran de meydanan de bî. Kurdistanijê ke tewrê pîrozkerdişê 1’ê Gulane bîyî xoverdayîşê grevê vêşnayîye silam kerd û bêvengîya Ewropa ya vera tecrîdî şermezar kerde.
Gottîngen
Bajarê Gottîngenî de zî Kurdistanijî zî tewrê pîrozkerdişê 1’ê Gulane bîyî û bi sloganan xoverdayîşê zîndanan silam kerd.
Saarbrucken
Bajarê Saarbruckenî de zî Kurdî aktîvîteya ke hetê sendîkayanê Almanan ra ameye organîzekerdene de ameyî têhet û bi pankarta grevê vêşanîye tecrîd protesto kerd.
Braunschweîg
Bajarê Braunschweîgî de zî bi weslîleya 1’ê Gulane Kurdistanijan û sendîkaya DGB’yî aktîvîteyî organîze kerdî. Sendîkayê Almanan, Partîya Çepe, HDK- A, DÎDF û Antîfa zî paştî daye înan.
Anavers
Bajarê Anversî yê Belçîkda de zî 1’ê Gulane bicoş ame pîrozkerdene. Şayîye de şexsê Leyla Guvene de xoverdayîşê grevê vêşanîye ame silamkerdene.
Vîyana
Paytextê Awusturya Vîyana de hetê komeleyan û federasyonan ê macîran ê Tirkîyayijan ra aktîvîteyêk ameye organîzekerdene. Aktîvîte de derheqê nêheqîye ke karkeran rê yenê kerdene ame qiseykerdene û kedkar û karkeran ra ame waştene ke wa ê wayîr heqanê xo bivejîyê.
Kopenhag
Paytextê Danîmarka Kopenhag de zî Kurdistanijî tewrê pîrozkerdişê roşanê kedkar û karkeran bîyî û bale ante xoverdayîşê grevê vêşanîye ser. Hetê bînî ra merkezê bajarî de standêk ame ronayene û derheqê tecrîd û rojeyê mergî de zanayîş ame dayene.
Toulouse
Bajarê Toulouse yê Fransa de zî 1’ê Gulane bi coşêkê pîlî ame pîrozkerdene. Aktîvîte de derheqê tecrîd û grevê vêşanîye de vilawekî ameyî vilakerdene.