Ewropa de çalakîyê protestokerdişê tecrîdî û paştdayîşê grevê vêşanîye dewam kenî. Vizêr reyna xeylî bajaranê Almanya, Fransa, û Swîsre  û Îtalya de çalakîyî ameyî viraştene.

Luzern

Bajarê Lurzernî yê Swîsre de rayberîya Têgêrayîşê Ciwanan ê Şorişgêrî de çalakîyek ameye viraştene. Çalakwanan şexsê Leyla Guvene de xoverdayîşê grevê vêşanîye silam kerd û bêvengîya Ewropa şermezar kerde.

Zurîh

Bajrê Zurîhî de zî hetê Platformê Paştdayîşê Grevê Vêşanîye ra çalakîyêk ameye organîzekerdene. Qiseykerdişan de ame vatene ke rewşa xoverdayoxan kewta merheleya krîtîke û Ewropa ra ame waştene ke vera naye bêveng memano. Çalakîye de Qirkerdişê Ermenîyan zî ame vîrardene.

Delemont

Delemont de zî semedê protestokerdişê tecrîdê serê Ocalanî û paştdayîşê grevê vêşanîye çalakîyêk ameye viraştene.

Floransa

Bajarê Floransa yê Fransa de zî Kurdistanijan û dostanê înan semedê paştdayîşê xoverdayoxan dest bi çalakîya grevê vêşanîye yê 2 rojan kerd. Çapemenîya Îtalya çalakîye rê zaf eleqe ramojna. Reyna derheqê grevê vêşanîye de parlamento rê dosyayêk ame teqdîmkerdene.

Bordeaux

Bajarê Bordeauxî yê Fransa de zî bi çalakîyêk paştî dîyaye xoverdayoxanê grevê vêşanîye. Çalakîye de derheqê tecrîd û grevan de xeylî vilewekî ameyî vilakerdene.

Frankfurt

Bajarê Frankfurtî yê Almanya de zî rayberîya Meclîsanê Cinîyan ê Amara, Sara û Nujîne de çalkîyêk ameye viraştene. Çalakîye de xoverdayoxanê grevê vêşanîye ameyî silamkerdene û bêvengîya Ewropa ameye şermezarkerdene.