Ewropa de çalakîyê protestokerdişê tecrîdî û paştdayîşê grevê vêşanîye dewam kenî. Vizêr bajaranê  Stockholm û Helsîngborgî yê Swêdî  û Rennesê Fransa de çalakîyî ameye viraştene.

Paytextê Swêdî Stockholm de  Meclîsê Cinîyan ê Kurdan ê Amara û Platformê Paşdayîşê Grevê Vêşanîye çalakîyêk organîze kerde. Çalakî de bêvengîya hukmatê Swêdî û Yewîya Ewropa ameye şermezarkedene.

Bajarê Helsîngborgî de zî  Kurdistanijan seba ke bale biance grevê vêşanîye ser merkezê bajarî de çalakîya xeyme viraşte . Çalakwanan derheqê tecrîdê serê Ocalanî û grevê vêşanîye de vilewekî vila kerdî. Çalakîya xeyme do 5 rojî bêro domnayene.

Bajarê Rennesî yê Fransa de zî Komela Cinîyan a Zîne û Merkezê Cimatî yê Demokratîkî çalakîyêk organîze kerde. Çalakî de tecrîdê serê Rayberê Şarê Kurdî Abdullah Ocalanî ame şermezarkerdene û şexsê Leyla Guvene de xoverdayîşê grevê vêşanîye ame  silamkedene.