Şaristananê Esslîngen, Duîsburg, Berlînî yê Almanya, şaristanê Anrhemî yê Holanda, şaristanê Bordeauxî yê Fransa û paytextê Awusturya Vîyana de şehîdî bi çalakîyan ameyî yadkerdene.

Şaristanê Esslîngenî yê Almanya de 6 şerwanê QSDyî yê ke hêrişanê Dewleta Tirkan ê vera Rojawanî de şehîd bîyî ameyî yadkerdene. Şerwanê QSDyî bi nameyê Mihemed Xelef (Levend Qamîşlo), Mihemed Şendî (Şehîd Agîrî), Mehmûd Şîndî (Şehîd Kindal), Şemdîn Hermêsi (Delîl Qamişlo), Hakki Ahmed (Hesen Qamîşlo), Rojhilat Çarçel (Şehîd Rojhilat Uzkas) şaristanê Esslîngenî yê Almanya de DKTMyî de ameyî yadkerdene. Qiseykerdişê nameyê DTKMyî ser o KOMAWî ra Lokman Arslanî qisey kerd û vat: "Şexsê 6 embazanê ma yê şehîdan de ez pêro şehîdan bi hûrmetî yad kena. Têkoşînê şarê kurdan se serran ra nat dewam keno û zaf şehîdî dayî." Temsîlkarê PYDyî Abîdîn Xurşîdî zî îfade kerd ke xoverdayîşê Rojawanî bi felsefeya azadîye her ke şino beno pîl. KON-MEDî ra Tahîr Koçerî zî vat ke xoverdayîşê Rojawanî xoverdayîşêko pîl o û pêro wareyan de dewam keno.Keyeyanê şehîda serweşîyî qebul kerdî û yadkerdişî bi deyîra Şervanoyî dewam kerd.

Şaristanê Duîsburgî yê Almanya de şexsê şehîdanê Dêrsimî de şehîd Çekdar Dêrik ame yadkerdene ke Til Temirî de şehîd bi. Yadkerdişî bi deqayêkê rêzgirewtişî dest pêkerd. Komîsyona Keyeyanê Şehîdan ra Resul Dêrsimî qisey kerd û îfade kerd ke Seyîd Riza û embazanê ey ê ke 82 serre verê cû ameyî qetilkerdene yad keno. Verfekanê PYDyî yê Ewropa ra Zozane Rojava, Wekîlê Verên ê HDPyî yê Wanî Lezgîn Botanî û Dogan Çelîkî qisey kerd û Zozane Rojava vat ke ê do şehîdanê Kurdîstanî taqîb bikê. Yadkerdişî bi slogananê ''Şehîdî nêmirenê, Bê serek cuye nêbena, Biciwîyo Serek Apo,'' qedîya.

Paytextê Almanya Berlînî de şexsanê Heme Reş (Muhammed Ferhan Saleh), Can Qamişlo (Abdulhemid Abdulselam), Şivan (Yusuf Nebi) ve Serxwebun Alî de şehîdê Xoverdayîşê Rûmetî ameyî yadkerdene. Yadkerdişî Komeleya Komelê Azadî de ame kerdene û keyeyê şehîdan, temsîlkarê dezgehanê Kurdîsyanî û 150 kesî tewrê yadkerdişî bîyî. Yadkerdişî de endama TJK-E û sîyasetmedara kurde Zozane Serhat qisey kerd û venga şarê kurdan da ke malan, turîzm û çapemenîya tirkan boykot biko.Dadîya Şehîd Heme Reşî zî bi telefonî tewrê yadkerdişî bîye û vat: "Lajê mi canê xo seba şarê xo dîyarîye kerd. O fermandarê şerwanan û tersê DAÎŞî bi." Yadkerdişî bi mojnayîşê sînevizyonêkî û slogananê ''Şehîd Nêmirenê, Biciwîyo Serek Apo'' qedîya.

Şaristanê Arnhemî yê Hollanda de şexsê Sefkan Dêrikî, Egîd Dêrikî û Rojinda Qendîl de şehîdê Xoverdayîşê Rûmetî ameyî yadkerdene. Yadkerdiş hetê KOMAWî ra ame kerdene û bi marşê ''Ey Reqîb'' dest pêkerd. KOMAWî ra Mehmed Zengînî, Temsîlkarê KNKyî Tahîr Kemalîzadeyî yadkerdişî de qisey kerd. Qiseykerdişê sîyasetmedar Ahmed Şêxoyî ra dima mesajê PYDyî ame wendene. Keyeyanê Şehîd Sefkan Dêrikî, Rojinda Qendil û Huseyn Nebî û Hemsereka DEM NEDî Şemse Gullu zî yadkerdişî de qisey kerd. Yadkerdiş bi sloganan qedîya.

Şaristanê Bordeauxî de şehîdê menga teşrîna peyêne ameyî yadkerdene. Seba şehîdan Rewane Çinar, Tekoşer Awaz, Bêrîvane Mira, Zinar Kanîreş, Roger Demhat, Havîne Rojava, Hakan Buksur sînevîzyonêk ame mojnayene. Sîyasetmedara kurde Nîmete Sevîm zî yadkerdişî de qisey kerd. Yadkerdişê seba şehîdan bi wendişê mewlûdî qedîya.

Paytextê Awusturya Vîyana de şehîdê Til Temirî Zafros Kobanê ame yadkerdene. Yadkerdiş Merkezê Komelê Demokratîkî yê Kurdan ê Vîyana de ame serûberkerdene û keyeyê Kobanê zî tewrê yadkerdişî bi. Yadkerdişî bi rêzgirewtişî dest pêkerd û waka Kobanê zî qisey kerd. Waka Kobanê îfade kerd ke birayê ci şehîdê pêro Kurdîstanî yo û seba naye keyeyê ci pê sereberz o. Waka Kobanê pare kerd ke ganî ciwanê Kurdîstanî verê xo bidê Tevgêrayîşê Azadîye. Yadkerdiş bi sloganan gedîya.