Binê roşnîya fikranê Rayberê Şarê Kurdî Abdullah Ocalanî de rêzekonferansê bi sernameyê 'Ma Dinyaya Xo Apey Wazenê', 'Xo Ver Bidê, Bigêrê û Newe ra Awan Bikerê', 'Perwerdeyî Xoser Bikerê û Xo Birêxistin Bikerê' yê bi şîarê 'Vera Modernîteya Kapîtalîste Vejîyayîş' vizêr qedîyayî.

Roniştişî ra verî derheqê fikranê Rayberê Şarê Kurdî Abdullah Ocalanî yê serê Konfederalîzmê Demokratîkî de tay beşî ameyî wendene.

Roniştişê peyênî yê konferansî de Koordînatora Komeleya Cinîyan a Wakoborunî Maria Leuse Kaba û Ediene Kirixi,  Aktîvîste Ajay Kumar û Endama Heyetê Rayberdişî yê TEV-DEMî û Endama Konseya Serekîye ya PYDyî Foza Yûsif qisey kerd.

Maria Leusa Kaba îfade kerd ke kapîtalîzm bi îşxalkerdişê erdî gefê mergî waneno.

Ajay Kumarî qala têkoşîn û serebûtanê peyênan ê Hîndîstanî kerde û ard ziwan ke dewleta Hîndîstanî seba ke kolonyalîzmo kapîtalîst-emperyalîst dewam bikero teda kena.

Foza Yûsif qiseykerdişê xo de qala tecrube û serebûtanê Rojawanî kerd û pare kerd ke înan xêrê modelê Rojawanî ra dî ke Konfederalîzmo Demokratîk çend girîng o. Foza vat: ''Konfederalîzmê Demokratîkî yo ke fikrê Rayber Apoyî yo, hişê ma yo kolekerde kerd azad. Çîyo ke 100 serrî yo nêameyo kerdene, 12 serran de kurdan Rojawan de kerd. Rojawan de bi hezaran embazê ma pê destê Erdoganî ameyî qetilkerdene. Têkoşînê Rojawanî xora asan nîyo. La şehîdan ra dima bi hezaran kesî tewrê têkoşînî bîyî. Ma qetî nê hêrişan ra nêtersenê.''