Veng da hukmatanê Skandînavya û CPT’yî ke hemverê tecrîdî û grevanê vêşanîye de bêveng memanê.

Joensene şaîrê Norwecijî Arnulf Overlandî nimûne ramot û vat, “Gama tayê kesî bidejê ganî kes bêveng memano” û bale ante serê tewirê Overlandî yê verê û dimayê Şerê Dinya yê Dîyinî yê hemverê binpaykerdişê heqanê merdiman û qirkerdişanê Nazîyan. Dimayo ke Nazîyan Norwec îşxal kerd Overland amebi tepiştene û înan o şirawitibi kampa kome.

Joensene vat, “Şaîrê Norwecijî Arnulf Overlandî vatêne, ‘Gama tayê dej ancenê, a game razînêbîyayîşê xo ramojne. Hemverê nêheqîye de bêveng memanê. Sey merdimêk hemverê zulmo ke ameyo kerdene de hurze.’ Peygoşkerdişê grevanê vêşanîye nêno qebûlkerdene ke na çalakî hetê bi hezaran tepişteyan ra yena rayraberdene û ameyê verê mergî.”

‘Seba ke Vernîya Aşitîye Bibo a Ganî Tecrîd Bêro Wedartene’

Joensene ard ziwan ke şaro Kurd hemverê bêedaletîye de mucadele keno, seba heqan û demokrasîyê rastekênî xover dano û vat, “Heqê şarê Kurdî yo ke sey heme şaranê bînan bieşko kultur û ziwanê xo bpiawo û aver bero.”

Ekonomîya Norwecî Sektorê Sîlehan rê Pabeste ya

Joensene hemverê polîtîkaya Norwecî ya rotişê sîlehan de reaksiyon da, bale ante ke ekonomîya Norwecî bi giranî pabesteya rotişê sîlehan a û vat, “Ganî ma hemverê nê çîyî de vejîyê ke seba huzûrê ma merdime welatanê bînan yenê kiştene. Ganî ma şarê xo rê qalê nê çîyî bikerê û şarî pê bihesnê. Ganî şarê Norwecî haya bo û hukmat û sîyasetmedaranê Norwecî ser o zextan bikero.”

Sîlehê Norwecî yê ke Tirkîya rê Roşîyenê Kewenê Destê DAÎŞ’î

Joensene ard vîrî ke dinya zî pêhesîya ke Tirkîya bi heme hawayî paştî dana DAÎŞ’î û vat, “Rixmê nê de Norwec û welatê bînî yê NATO’yî Tirkîya rê sîlehan roşenê. Sîyasetmedarî zî seba menfaatanê xo bêveng manenê.”

Joensene bale ante serê bêxemîya medyaya ke ca nêdana xeberanê rotişê sîlehan û vat, “Ma dima ra pêhesîyayî ke sîlehê Norwecî yê ke Tirkîya rê roşîyayê kewtê destê DAÎŞ’î û hemverê Kurdan de ameyê şuxulnayene. Labelê meclis û medya na babete ser o qe nêvindenê.”

Erdogan Rojawanî ra Terseno

Joensene peynîya qiseykerdişê xo de vat, “Seba ke Rojawan de bawerî û şarê cîyayî pîya ciwîyenê Erdogan terseno ke no do şarê Vakurê Kurdistanî ser o zî tesir bikero. Çunke Tirkîya de demokrasî û heqê merdiman nêmendê. Ê dîktatorîyêk awan kerda û serê her çîyî de qerar dano. Her ke qisey keno mîyanê şarî de nefretî vila keno. Nêwazeno ke şar sîstemêkê demokratîk û seypêyî yê sey Norwecî biciwîyo. Peyê hêrişkarîya ê ya Rojawanî de tersê ê esto.”