Grevê vêşanîye yê girseyî yo ke bi seyan kesî beşdarê ci bîyî û verê PE’yî de amebi destpêkerdene dima meydanê Kleberî yê merkezê Strasbourgî de rayraşîyayîşêk ame viraştene.

Rayraşîyayîş de bê mabên sloganê “Ma heme Leyla yê,” “Biciwîyo Serek Apo”, “Qatilkar Erdogan”, “Ocalanî rê azadîye” bi ziwananê Îngilîzkî, Franskî, Almankî, Tirkî û Kurdkî ameyî qîrîyayene. Reyna resimê Leyla Guvene, Nasir Yagizî û 14 xoverdayoxan ê Strasbourg de grevê vêşanîye de yê û xoverdayoxanê bînan ameyî akerdene. Pankarta ke ser o resimê Ûgûr Şakar o ke Almanya de xo vêşnabi û nuşteyê “Tecrîdî bişiknê, Fazşîmî birijnê, Kurdistanî azad bikerê” ameye akerdene. Dimayê rayîraşîyayîşê bi qase 3 kîlometreyan  Wareyê Kleberî de mîtîngêk ame viraştene.

Ocalan azad nêbo Kurdistan azad nêbeno

Endemê Heyetê Pîran ê Federasyonê Elewîyan ê Demokratîkî (FEDA) Pîr Riza Yagmurî qisey kerd û bale ante serê têkoşînê hempar ê vera polîtîkayanê qirker-faşîst ê dewleta Tirkî û vat; “Şarê Kurdî do bi ruhê şiknayîşê tecrîdî şoro serê sindoqan û şaredarîyê ke ameyê xespkerdene apey bigê. Heta Ocalan azad nêbo Kurdistan azad nêbeno. Ganî wextê verê ma de Kurdî ligan ser o bê, xo ver ro bidê ke Rayberê xo û Kurdistanî azad bikê.”

Mîtîng de analîstkar Thoreaû Redcrow o ke bi xebatanê xo yê serê gerîlayan ê Kurdî yeno şinasnayene qisey kerd. Redcrowî bale ante serê tecrîdê girankerdeyî yê serê Rayberê Şarê Kurdî Abdullah Ocalanî û ard ziwan ke hêzê peyê çeteyanê DAÎŞ’î  hişmendîya faşîşt a AKP-MHP’î ya.” Redcrowî ard ziwan ke tecrîdê serê Ocalanî nêno qebûlkerdene û da zanayene ke Ocalan zî sey Nelson Mandelayî tecrîd ser o yeno kerdene.

Bi nameyê Partîzanan zî qiseykerdişêk ame kerdene û ame vatene ke ganî şarê bînî zî şarê Kurdan reyde vera faşîzmî têkoşîn bikerê.

Peynîya mîtîngî de ame vatene ke grevê vêşanîye yê girseyî yo ke 5 rojî yo Strasbourg de yeno viraştene Yewşeme ra dima verê Konseya Ewropa de do dewam bikero.