Rêxistina Qedexekerdişê Çekan ê Kîmyewîyan (OPCW) vera hêrişanê kîmyewîyan ê dewleta tirke ya îşxalkere bêveng a la ciwanê ke bêvengîya OPCWyî protesto kerdî ameyî cezakerdene. Çalakîya Den Haagî ya vera OPCWyî de 44 ciwanî ameybî destbendkerdene.

44 ciwanan ra 40 ciwanî sînorî ra ameyî teberkerdene û wextê nezaretî yê 4 ciwanan zî seba 2 hewteyan ame dergkerdene. Bêvengîya OPCWyî bena sebebê nêrazîbîyayîşê kurdan.

Ciwanê ke 3ê kanûne de çalakîye ameybî destbendkerdene, nînan ra tay kesî seba ke hemwelatîyê Hollanda nêbîyî sînorî ra ameyî teberkerdene. 4 ciwanî zî hema zî nezaret de yê.

Avûkatê ciwanan Huseyîn Aktaşî pare kerd ke bira dergkerdişê wextê nezaretî yê ciwanan goreyê eşkerayîyanê Erdoganî ameya girewtene û vat: ''Erdoganî vatbi 'qederê 50 PKKgîran Hollande de birîya. Çunke ê wazenê tîya de operasyon bikerê.' Pê fermanê Erdoganî wextê nezaretî ame dergkerdene, bi nê hawayî zî merdimê ke vera çekanê kîmyewîyan têkoşîn kenê yenê tersnayene.''

Ciwanî wazenê OPCW, Neteweyê Yewbîyayeyî û Xaço Sûr vera çekanê kîmyewîyan mesuldarîya xo bikerê û hêrişanê kîmyewîyan ê vera Zap, Metîna û Avaşînî cibigêrê. Hemserekê Konseya Komelê demokratîkî yê Kurdîstanî (DEM-NED) Huseyîn Yildizî pare kerd ke dewleta tirke 7 mengan de tewr tay 300 reyî çekê kîmyewî şuxilnayî û vat: ''5 mengî yo kurdî, enternasyonalîstî dosyayan danê dezgehan, çalakîyanê demokratîkan kenê. Labelê hêzê serdestî vera çekanê kîmyewîyan bêveng ê.''

Yildizî da zanayene ke ciwanê ke nezaret de yê sereyê xo nêanê war û vat: ''Eke hegemonê dinya vera qirkerdişê kurdan bêveng bibê û vera her tewirê hêrişî hetê dezgehanê faşîstan de ca bigêrê kurdan rê têna rayîrê xoverdayîşî maneno.''

ÇIME: YENÎ OZGUR POLÎTÎKA