Hemserekê KNKyî Ahmet Karamus, îdarekarê KNKyî Mecît Heso, Hemserekê Merkezê Komelê Demokratîkî yê Kurdan ê Swêdî, Endamê KCDK-E Başûr û Hemserekê Nav-Berlinî zî tede heyetêkê KNKyî sînorê Polonya-Belarusî de koçberî zîyaret kerdî.

Hemserekê Nav-Berlinî Huseyîn Yilmazî vat: ''Komîsyonê ma ame serê sînorî. Polîs û leşkeran nêverda ke 8 kîlometre ra zêdêr nêzdîyê sînorî bibo. Dewleta Polonya nêverdena ke rêxistinê komelê sivîlî û heyetê sivîlî koçberan reyde têkilîye ronê. Ma derheqê babete de eşkerayîye daye çapemenîye. Key ma agêrayî Varşova ma Rêxistina Heqanê Merdiman a Helsinki û Rojnamegerê Sînornenasî dîyî.

Rêxistinanê Polonya bi germî ma pêşwazî kerdî la vat ke hukmatê Polonya nêverdeno ma şorê koçberan bivînê. Ma wina fikirîyenê ke Polonya do koçberan qebul nêkera. Tîya de her roje merdimî mirenê, dezgehê hetkarîye her roje eşkerayîyan danê ka nêverdenê hetkarîye biresê înan.''

Yilmazî derheqê xebatanê heyetî de vat: ''Helbet ewro siba ma do qisey bikerê. Ma hema zî Varşova de pêvînayîşan kenê. Ma do reyna şorê sînorî. Ma do koçberan reyde ronişê.''

Yilmazî pare kerd ke înan Heyva Sore reyde têkilîye ronaye û vat ganî hetkarîye Heyva Sore ser ra bêra erşawitene.