Menga Remezanî 6'ê Gulane de dest pêkena. Dezgehê hetkarîye yê Heyva Sor a Kurdistanî bi wesîlaya menga Remezanî kampanyaya hetkarîye daye destpêkerdene. Heyva Sor a ke her serre bi kampanyayanê winayênan bi hezaran kesî kenê zerreweş, emser zî do hetkarîye şarê Rojakewtena Kurdistanî  yo ke bobelata laserî ra zirar dîbi rê bişawê.

Fître û zekatanê xo Rojakewtena Kurdistanî rê bişawê

Heyva Sor a Kurdistanî bi eşkerayîyêka nuştekîye bobelata emserî  ya Rojakewtena Kurdistanî arde vîrî û vat, ”Rîyê bobelata laserî ra hema hema heme Rojakewtena Kurdistanî zirar dî, xeylî bajar,  bajarek û dewî binê awe de mendî. Xeylî merdîmî merdî û bî brindar. Bi hezaran merdiman zî keye û ca û cangeyê xo caverdayî û hewcadarîya înan bi hetkarîya lezabeze esta. Ma pawitişê hetkarîye û hêvîya şarê xo bîyarê ca û birînanê înan bipîşê. Seba ke ma wezîfeyê xo yê menga Remezanî bîyarê ca dest bidê yewbînî û destê hetkarîye dergê merdimanê xo bikerê. Şima eşkenê fître û zekatanê xo bi rayîrê Heyva Sor a Kurdistanî biresnê mexdûranê bobelata laserî yê Rojakewtena Kurdistanî.”

Xeyrheskerdoxî, serê şexsî tewr kêmî 10 Euro eşkenê fître û zekatanê xo bi rayîrê Heyva Sor a Kurdistanî bidê kesanê mexdûran.  Şima eşkenê biresê hûmarayanê hesaban û rewşa kampanya.

Heyva Sor a Kurdistanî par fître û zekatî şawîbî Efrînijan rê ke rîyê îşxalkerdişê artêşa Tirkî ra koçe bi Şehba kerdibi û reyna şawîbî şarê Sûr, Cizîr, Silopî û Nisêbînî rê. Heyva Sor a Kurdistanî 260 hezar Euro hetkarîya madîye şawitebî.