Grevê vêşanîye yê vera tecrîdê serê Rayberê Şarê Kurdî Abdulah Ocalanî yê Strasbourgî yê Fransa roja 136’ine de dewam keno.

Sîyasetmedaro Kurd Bedrettîn Kavak wextê serdana çalakwanan de qisey kerd û vat, sere de Leyla Guvene û Nasir Yagiz, rewşa xeylî çalakwananê grevê vêşanîye reşta sînorê tehlukeyî.

Kavakî ard ziwan ke serdayîşî zor bi çalakwanan kenê, vat verê o zî hepisxane de kewto grevê vêşanîye, çalakwanê ke xoverdayîşêkê girdî nîşan danê wayîrê îradeyê xurtî yê.

Çalakwanan merheleya krîtîke xo pey de verdaye

Kavakî derheqê rojeyê mergî yo ke vizêrî dest pêkerdo de vat, rewşa xoverdayoxan a ke 137 rojî yo grevê vêşanîye de yê û rewşa xoverdayoxanê bînan zî merheleya krîtîke xo pey de verdaye. Kavakî bi taybetî rewşa Leyla Guvene û Nasir Yagizî nîşan daye, ke Guvene 175 rojî û Yagiz zî 162 rojî yo grevê vêşanîye de yê.

Çi destê kamî ra yeno ganî bikero

Kavakî vat, “Her game beno ke ma nê hevalanê xo vîndî kenê. Seba naye zî ganî ma xoverdayoxan rê wayîr bivejîyê û verê merdişî bigêrê” û vengdayîşê seferbîyayîşî şarî rê kerd.

Kavakî vat, “Çi destê kamî ra yeno ganî bikero” û ard ziwan ke hem bi xebatanê dîplomasî û hem zî bi xebatanê ke şarî reyde yenê kerdene ganî paştdayîş seba xoverdayoxan bêro dayene.

Kavak 14 serrî hepisxane de mend û serra 1980 de rojeyê mergî de ca girewt. Kavak tewr peynî de 2015 de Almanya de bi hawayêkê nehuqûqî ame girewtene û 3 serrî hepisxane de mend.