Paytextê Fransa Paris de 9ê çeleyê 2013î de ronayoxanê PKKyî ra Sakîne Cansiz (Sara), Temsîlkara KNKyî Fîdane Dogan (Rojbîne) û Endama Têgêrayîşê Ciwanan Leyla Şayleme (Ronahîye) ameybî qetilkerdene. 23yê kanûna 2022yî de Paris de Evîn Goyî (Emîne Kara), hunermend Mîr Perwer (Mehmet Şîrîn Aydin) û welatperwer Abdurrahman Kizil hêrişê vera Merkezê Kulturê Kurdan ê Ahmet Kayayî de ameyî qetilkerdene.

Kongreya Komelanê Demokratîkan ê Kurdîstanijan ê Ewropa (KCDK-E) bi eşkerayîyêke şehîdê Qirkerdişanê Parisî yad kerdî.

KCDK-E eşkerayîye de vist vîrî ke wird qirkerdişî zî hetê dewleta tirke û îstîxbaratê ci MÎTî ra ameybî plankerdene. KCDK-E bale ante ser ke eke dewleta Fransa Qirkerdişê 2013î de edalet biardêne ca Qirkerdişê 2022yî do nêameyêne kerdene.

KCDK-E vat: ''Tarîx, merdimatîye û kurdî do ê kesanê ke verê nê qirkerdişan de bêveng mendê efû nêkerê. Wijdan û edaletê merdimatîye do ser bikewê. Têkoşînê azadîye yê kurdan do peynî de kiştoxanê esasan ê nê qirkerdişanê namerdan vejo verê edaletî.

Ma bi na wesîle venga pêro kurdîstanijan û dostanê xo danê ke 23yê kanûne de tewrê rayraşîyayîşê merkezî yê Parisî û pêro Ewropa, Avusturalya û Kanada bibê, seferber bibê û heta edalet bêro caardene tewirê xo yê qerardarî rê dewam bikerê.''