KCDK-E bi beyanatê nuştekîyî kerd eşkera ke ê do nê çalakîyan ê girseyîye seba ke talebê girewteyan bêrê qebulkerdene û CPT bikewo dewre bikerê.  Çalakîyê roniştişî do 1 û 5’ê Nîsane de verê Parlamentoyê Ewropa, Berlîn de verê Parlamentoyê Federalî de û Strasbourg de zî verê Konseya Ewropa de bêrê viraştene.

Beyanatê KCDK-E wina yo:

 “Her çiqas ke rewşa xo bibo girane zî, Leyla Guvene û bi hezaran girewteyê sîyasîyî grevê vêşanîye domnenê. Bajarê Strasbourgî yê Fransa de 14 kesî, Almanya, Swîsre, Kurdistan, Îngilîstan, Holanda, Kanada û her hetê dinyaye de xoverdayîşê grevê vêşanîye dewam kenê. Grevê vêşanîye yê ke bi şîarê “Ma do tecrîdî bişikê, Faşîzmî birijnê, Kurdistanî azad bikê” dewam kenê, hetê şarê Kurdî û dostane înan ra nêzdî ra yenê teqîbkerdene û paştdarîyê dîyena ci. Xoverdayîşanê grevê vêşanîye dinyaye de tesir girêdayo û îqtîdarê Erdoganî kerdo tenge. Tecrîdo ke Birêz Ocalanî ser, sey yew parçeyê şerê taybetî yeno domnayene, teberê hiqûqê mîyanneteweyîyî yo.

Wezîfeyê xo bîyar ca CPT!

Dewletê Ewropa û Sazîyê Ewropa wayîrê erjanê xo nêvejînê. Seba ke mergî bidê vindertene, derhal wezîfeyê xo bikerê. Sere de Konseya Ewropa û CPT, dewlet û sazîyê Ewropa goreyê erj û prensîbanê xo tê nêgêrenê û nê sûcî rê bîyê şîrig. KE û CPT bi seyan çalakwananê grevê vêşanîye nêvîneno û terkê mergî keno. La Zulkuf Gezen, Ugur Şakar, Ayten Beçene û Zehra Saglame bi çalakîyaNê fedaîyan qerardarîya xo kerde eşkera. Pêro çalakwanî vanê heta ke tecrîd nêro şikitene, ma do çalakîyanê xo dewam bikerê. Tecrîdo ke Îmralî de serê Rayberê Şarê Kurdî Abdullah Ocalanî de yeno domnayene, eynî wext de serê pêro şarê Kurdî de yeno bicaardene. Ganî vengê seyan kesê ke bedene xo vêşanîye rê fisto ra bêro heşnayene. KE û CPT bi bêvengîya xo benê şîrigê sûcanê dewleta Tirkî. Çalakwanê grevê vêşanîye seba ke wezîfeyê xo bîyarê ca venga KE û CPT’yî danê.

Mabênê tarîxanê 1 û 5’ê Nîsane de çalakîyê hemwextî

Seba ke KE û CPT bîkewê dewre û problemi çareser bikerê, şarê ma do mabênê tarîxanê 1 û 5’ê Nîsane de Bruksel, Berlîn û Strasbourg de çalakîyanê roniştiş û grevê vêşanîye bi girseyîye bivirazo. Ganî her kes û her hetî, seba ke hîna zêde kesî memirê vengê xo bikerê berz. Bi taybetî zî şarê ma kar û güreye xo, dibistan û keyeyê xo caverdo û seba anorê Kurdan beşdarê nê çalakîyan bibo. Şarê m abi ruhê Newroza 2019’î xoverdayîşan rê wayîr bivejîyo. Reynama wazenê  dostê ma û merdimê bianorî zî beşdarê çalakîyanê ma yê hemwextan ê Bruksel, Berlîn û Strasbourgî bibê. Ma sey KCDK-E’yî vanê şarê ma yo welatperwer, şorişgêrî, demokratî, roşinvîrî, cinîyî, ciwanî vera dîktatorîya Erdoganî beşdarê çalakîyanê ma yê hemwextan bibê û vera zul û zordarîye vengê xo bikê berz.