Grevê vêşanîye yo ke Berlîn de seba wedaritişê tecrîdkerdişê Rayber Şarê Kurdî Abdullah Ocalanî yeno kerdene, dewam keno. Serdayîşê seba xoverdayoxan; Cemal Kobanê, Omer Bagdûr, Mele Mûstafa Tûzak û Şîyar Xelîlî zêde benê.

Vizêrî zî keyeyê çar xoverdayoxan şi serdana înan. Keyeyan bi hawayêkê grube şi serdana înan û seba wedaritişê tecrîdkerdişê Rayber Şarê Kurdî Abdullah Ocalanî vengdayîşê girdkerdişê têkoşînî kerd.

Keyeyanê Tûzak, Xelîl, Kobanê û Bagdûrî çalakwanan reyde xoşebere kerde û bado vengdayîş bi şarê Kurdistanî rê, hetkarê heqanê merdiman û demokrasî kerd ke xoverdayîşî ra wayîr bivejîyê. Keyeyan da zanayene ke, her çar aktîvîstî bi qerardarîye çalakîya xo dewam kenê û vat, “Seba nê vindetişê şima ma bi şima sereberz ê.”

Bagdûr: Vengdayîşê mi bi taybetî dayîkan rê yo

Omer Bagdûrî bi nameyê çalakwanan her kes silam kerd û seba serdayîşî sipasîya xo arde ziwan. Bagdûrî bi taybetî vengdayîş bi dayîkanê Kurdistanijan rê kerd û vat, “Ganî her dayîke seba girewteyan bifikirîyo û wina vaja: Beno ke rojêk domanê mi zî keweno hepis û tecrîdêko bi nê hawayêkê giranî bi ci yeno kerdene.”

Bagdûrî da zanayene ke, ganî xoverdayîşo ke bi serkêşîya dayîkan yeno kerdene bêro girdkerdene û vat, “Her wextî ra hîna zêde ma bi serkewtişî bawer ê , seba ke ma têkoşînêkê heqdarî rayra benê û heta peynîye ma do nê têkoşînê xo dewam bikerê. Bado zî Şîyar Xelîlî qisey kerd û vat, “Bedelê xo çi beno wa bibo, heta ke ma xebere Rayber Apoyî ra nêgirewte ma do tu cara dest çalakîya xo ra ranêverdanê. Wa kes naye ra guman nêkero.”

Rixmê spazma zerrî, viritiş û bînegirewtişî de zehmetantişî zî her çar çalakwanî tedawîyê tibî qebûl nêkenê. Mele Mûstafa Tûzak 113 rojî, Şîyar Xelîl 100 rojî, Cemal Kobanê û Omer Bagdûr zî 97 rojî yo grevê vêşanîye de yê.