Hemsereka Partîya Çepe Katja Kîppînge veng da hukmatê Almanî yê federalî û vat, “Hemkarîya xo ya leşkerîye ya bi rejîmê Erdoganî vindarnê û seba tepişteyanê sîyasîyan ê Tirkîya bikewê mîyanê têgêrayîşî.”
Dimayo ke serekkomaro Tirk û serekê pêroyî yê AKP’yî Recep Tayyîp Erdoganî netîceyê weçînitişê cayîyî yê 31’ê Adare yê Tirkîya û Vakurê Kurdistanî nas nêkerdî, Almanya ra vengdayîşêk ame kerdene.
Hemsereka Partîya Çepe Katja Kîppînge serê hesabê medyaya cimatkîye ra peyamêk şirawit û nizdbîyayîşê Erdoganî yê netîceyê weçînitişî ercna.
Kîppînge vat, Erdogan seba bieşko Şaredarîya Bajarê Pîlî yê Stenbolî bifîno dest bi hawayêkê eşkerayî qalê newe ra weçînitişî keno û vat, “Despot bi hawayêkê eşkerayî nêwazeno ke nê binkewtişî qebûl bikero.”
Kîppînge veng da hukmatê federali û ci ra waşt ke hemkarî û hetkarîya xo ya leşkerîye ya seba dewleta Tirkî vindarno. Kîppînge vengdayîşêkê winayênî kerd:
“Hukmato federal herinda hetkarîya leşkerîye de ganî serê halê tepişteyan ê sîyasîyan ê Tirkîya û seba destpêkerdişê prosesêkê neweyî yê aşitîye bikewo mîyanê têgêrayîşî.”
