Seba wedaritişê tecrîdê serê Rayberê Şarê Kurdî Abdullah Ocalanî bi serkêşîya Hemsereka KCD’yî Leyla Guvene grevê vêşanîye amebi destpêkerdene. Cenevre de Mehmet Alî Koçak zî 20’ê Sibate de dest bi greve vêşanîye yê bêdem û bêagêrayîşî kerd.

Polîsanê Cenevreyî destûr nêdabi ke Koçak vernîya banê Neteweyê Yewbîyayeyî de çalakîya xo dewam bikero. Koçak nika çalakîya xo Merkezê Cimatê Kurdan ê Demokratîkî de dewam keno.

Ganî berê zîndanê Îmraliyî bêrê akerdene

Roja 50’ine ya xoverdayîşî de Koçakî ANF’yî rê qisey kerd û vat, “Çîyo muhîm o yo ke ganî dêsê bêvengîye bêrê rijnayene û berê zîndanê Îmraliyî bêrê akerdene. Tecrîd sûcêkê merdimîye yo, ganî teyna Kurdî ney, kesê ke xo ra vanê ez merdim a, vengê xo berz bikerê. Werrekna ma hîna rew dest bi xoverdayîşî bikerdêne. Heta ke ma netîce nêgîrê ma do nê çalakîyan dewam bikerê û tecrîdî bişiknê. Ma bi moral ê. Ma bawarê ke ma do ser bikewê.”

Tirkîyaye çeteyêk îdarê keno

Koçakî ard ziwan  ke Tirkîya de  bi nameyê dewlete tu sazgehêk nêmendo û vat, “No çete wazeno ke serê gonîya Kurdan payan ser bivindo. O yo ke DAÎŞ awan kerd zî çeteyê Tirkîya yê. No çete binkewtişê DAÎŞ’î qebûl nêkeno û  hêriş bi Kurdan keno. Tecrîdê serê Rayberîya ma zî parçeyêkê nê polîtîkayî yo.”

Koçakî bale ante serê grevê vêşanîye yê ke hepisxaneyan de yeno dewam kerdene û vat, “Hepisxaneyan de serê hevalanê ma de tecrîdêko giran esto. Vera nê çîyî zî xoverdayîşşêkê qehremanî zî esto. Ganî şarê ma goş bido hepisxaneyan ser. Êdî wextê  vindertişî nîyo. Destê kamî ra çi yeno ganî  ey çîyî bikero. Watişê ma, watişê merdimîye yê, tecrîd sûcêkê merdimîye yo, ganî tu kes vera nê çîyî de bêveng nêmano.”