AVEG-Kon’î derheqê grevanê vêşanîye yê bêdem-bêdore yê vera tecrîdê serê Rayberê Şarê Kurdî Abdullah Ocalanî de beyanat da. AVEG-Kon’î waşt ke talebê çalakwanan derhal bêrê ca û waşt ke dewletê Ewropa, seba ke tecrîd bêro wedaritene şorê Tirkîya ser.

Beyanat de ame vatene ke 7’ê Hezîrane 2015’î ra nat, hedefê pêro hêriş û qirkerdişê ke Tirkîya û Kurdistan de yenê bicaardene de, Rayberê Şarê Kurdî Abdullah Ocalan esto û bi tecrîdê serê Ocalanî waşt ke Kurdan bîyarê çok û destkewteyanê înan çin bikerê.

Beyanat de bale ancîyaye ser ke, çalakîyanê Leyla Guvene, Nasir Yagiz û çalakwananê Strasbourgî her hetê dinyaye de tesîr dayo girê, 16’ê Kanûne de 330 girewteyan û 1’ê Adare de ra nat zî 5 hezarî ra zêde girewteyan dest bi grevê vêşanîye kerdo.

Seba ke talebî bêrê ca, ganî Tirkîya rê tedayî bêrê kerdene

AVEK-Kon’î va goreyê hiqûqê mîyanneteweyî û mutabaqatê mîyanneteweyîyî ganî talebê Leyla Guvene û çalakwananê bînan hetê dewleta Tirkî ra bêrê caardene.

Beyanat wina ame dewam kerdene: ”Heta nika hepisxaneyan de 6 girewteyan bi çalakîya fedaîyîye xo kişto û Ûgûr Şakarî zî Almanya de bi çalakîya fedaîyîye peynîya cuya xo arda. Ma nêwazenê hîna zêde kesî bimirê.”

Ame waştene ke sere de CPT, Komîsyonê Ewropa, sazîyê sey NY’yî û dewletê Ewropa kerdenanê Tirkîya ver bêveng nêmanê û hetê sîyasî û ekonomîyî ra paştdarîye nêdê Tirkîya.

Ganî Tirkîya rê tedayî bêrê kerdene

Ozan H. Ozdemîrî vera tecrîd û faşîzmî mabênê tarîxê 1 û 5’ê Nîsane de kewtibi grevê vêşanîye yê 5 rojinî û Ozdemîrî çalakîya xo aver berde û kewt grevê vêşanîye yê bêdem û bêdore.

Dewamê Beyanatî de wina ame vatene: “Waştişê xoverdayoxanê ma yê grevê vêşanîye: Leyla Guvene heqdar a, ganî, talebê 5 hezar girewteyan, ê xoverdayoxanê Strasbourg, Hewlêr, û cayanê bînan bêrê ca û tecrîd derhal bêro wedaritene.

CPT, NY vera dewleta Tirkî ya ke mutabaqat û hiqûqê mîyanneteweyî binpay kena tê bigêrê. Ganî dewletê Ewropa êdî bêveng nêmanê û bi bêvengîya xo paştdarîye nêdê dewleta Tirkî. Seba ke talebî bêrê ca, ganî dewleta Tirkî rê tedayî bêrê kerdene.”