KOMAWî derheqê hêrişanê kîmyewîyan ê dewleta tirke de dezgeh û partîyanê Ewropa yê sey CDU, SPD, Die Gruenen, Die Linke û Wezaretanê Karanê Teberî rê mektubêke şawite.

Mektube de ame vîrvistene ke hêrişanê kîmyewîyan ê dewleta tirke de 11 gerîlayî şehîd bîyî, 3 gerîlayî birîndar bîyî, dewleta tirke 5 menganê peyênan de 138 reyî çeka kîmyewîye vera gerîlayan şuxilnayî û tay keyeyê başûrijî zî pê jehrê kîmyewîyî nêweş kewtî.

KOMAWî mektube de bale ante ser ke dewleta tirke ya îşxalkere şaristananê Girê Sipî, Serêkanîyê û Efrînî yê Rojawanî de zî çeka kîmyewîye şuxilnabî û Tirkîya semedo ke naye binimna ruşwet dabi Rêxistina Qedexekerdişê Çekan ê Kîmyewîyan (OPCW). KOMAWî da zanayeke hêrişanê vera Garê de 10-13yê sibata 2021î de Wezîrê Pawitişî yê Tirkîya Hulusî akarî îtîraf kerdbi ke înan gazo kîmyewî şuxilnayo.

KOMAWî vat: ''Ma sere de Neteweyê Yewbîyayeyî, Yewîya Ewropa, Parlamentoya Ewropa û OPCWyî venga pêro dezgehan danê ke vera hêrişanê kîmyewîyan erkê xo bîyarê ca, bêvengîye war verdê, mebê hemparê sûcanê Tirkîya. Ma venga şarê Kurdîstanî û dostanê ci danê ke zêdêr wayîrê wezîfeyê xo vejîyê, semedo ke verê hêrişanê Tirkîya bêro girewtene pê pêro îmkananê xo têbigêrê.''