Paştdarîyê grevê vêşanîye yo ke seba şikitişê tecrîdê giranî yê serê Rayberê Şarê Kurdî Abdullah Ocalanî ke bi serkêşîya hemsereka KCD’yî Leyla Guvene dest pêkerdibi dewam kenê.

Têgêrayîşanê Cinîyê Enternasyonalîstî yê Femînîstî yê Swîsre seba vengê 7 hezar tepişteyanê ke grevê vêşanîye de yê bêro şinawitene, çalakîya ‘7 hezarî pankartî’ ke bi hewteyan o amadekarîya ci kerdêne daye destpêkerdene.

Çaçrçewaya kampanyaya ke bi slogana “Ma vengê nê xoverdayîşî şinawit, wext wextê dayîşeşnawitişê nê vengî yo’ dest pêkerde de cinîyan ewro xeylî mehlayanê Swîsre de pankartê ke bale ancenê serê grevan kiriştî. 

Cinîyan seba xurtkerdişê paştdarîya mîyanneteweyîye û xoverdayîşê Leyla Guvene û yê tepişteyanê zîndanan hîna rind bêrê famkerdene, wareyanê pêserameyîşî de û balkonanê awanîyan de zî pankartan daliqnenê.

Cinîyê ke bi vatişê ‘Mevajê çîyêk nêbeno, çîyêk bikerê’ kewtî têgêrayîşî mîyan, balkonanê keyeyan, kargehan, piran, rayîranê bajarî, mehlayan, trênan, tramvayan û xeylî cayanê cîyayan de bi pankartanê ke kiriştî bale antî serê tecrîdbîyayîşê Ocalanî û grevanê vêşanîye ser.

Ê pankartê ke ameybî kiriştene înan ra tayênan ser o nê nûşteyî estbî: ‘Ma vengê xoverdayîşî yê,’ ‘Heqîqet eşq o, eşq zî cuya azade ya, Ocalan,’ ‘Vengê zîndanan bieşnawê,’ ‘Veng bidê xoverdayîşê cinîyan’ û ‘Bibê vengê Leylayan.’