Koln de seba awankerdişê kongre ya konfederasyonî Kurdê ke 5 eyaletan de xo rêxistin kerdo ameyî têhet. Fed-Med, FCDK, FCK, FCDK Almanyaya Rojakewtene, Fed-Dem, binê nameyê KON-MED’î de ameyî têhet.

Kongre bi rêzgirewtiş û slogananê ‘Şehîdî nêmirenê’ û ‘Biciwîyo Serek Apo’ dest pêkerd.

Hemsereka KCDK-E’yî Fatoş Goksungure, temsîlkarê FEDA, CÎK, YJK-E, PYD, HDK-A û sîyasetmedare Nursel Aydogane, Tugba Hezere, Leyla Bîrlîke, Huseyîn Yildiz û 567 delegeyî tewrê kongre bîyî.

Hemsereka KCDK-E’yî Fatoş Goksungure kongre de qisey kerd û vat ke, “Kongreya ma ya ewroyî, Almanya de seba awankerdişê konfederasyonêkê ya tewr verên a. Nê konfederasyonî de Kurdî û koçberê ke Almanya de ciwîyenê do ca bigêrê.”

Namzedê Partîya Çepe yê Parlementoyê Ewropa Mûrat Yilmazî vat, “Ma nêverdanê ke Almanya vengê ma qut bikera. Parlemento de ma do qalê azadîya Rayber Apoyî bikerê.”

Bi nameyê Têgêrayîşê Ciwananê Şorişgêran, Andoz Bazî zî vat, “Modernîteya kapîtalîste rûmetanê merdimîye binpay kena. Ma ciwanî, ma do sîstemê xoserî yê demokratîkî yo ke Rayberîye pêşkêşê ma kerdo, her ca de bidê ciwîyayene.”

Dimayê qiseykerdişanê temsîlkaranê dezgehan, nîzamname ame wendene û seba hemserekatîye pêşnîyazî ameyî kerdene. Seba rayberîye 23 kesî û seba hemserekatîya KON-MED’î Tahîr Koçer û Leyla Acare ameyî weçînayene.