Seba ke Yewîya Ewropa, Konseya Ewropa û Komîteya Vernîgirewtişê Îşkenceyî (CPT) seba grevê vêşanîye yê seba wedaritişê tecrîdê serê Rayberê Şarê Kurdî Kurd Abdullah Ocalanî, bikewê mîyanê têgêrayîşî 24’ê Nîsane de Meydanê Luksemburgî yê vernîyê Parlementoyê Yewîya Ewropa de, mîtîngêkê merkezî do bêro viraştene.

Mîtîng do saete 13.00 de dest pêbikero û Almanya û Fransa ra beşdarbîyayîşî bibê. KCDK-E’yî derheqê mîtîngî de eşkerayîyêk weşanaye û seba tewrbîyayîşî veng da.

Eşkerayîya Dîwanê Hemserekatîya KCDK-E’yî wina ya:

“Seba wedaritişê tecrîdkerdişê Rayberê Şarê Kurdî Kurd Abdullah Ocalanî, Leyla Guvene 7’ê Teşrîna Peyêne 2018 de dest bi grevê vêşanîye yê bêdem û bêagêrayîşî kerd. Xoverdayîşo ke Guvene dayo destpêkerdene, pêl bi pêl gird bi. Xoverdayîşê grevê vêşanîye yê Leyla Guvene 5 mengî xo pey de verdayî.

Hewlêr, Strasbourg, Gal, Almanya, Hollanda, Kanada, Mexmûr de û teba girewteyê sîyasî yê hepisxaneyan de 7 hezar kesî grevê vêşanîye de yê. Weşîya çalakwananê grevê vêşanîye resta sewîyêka krîtîke. Yewîya Ewropa, Konseya Ewropa û CPT çimê xo tecrîdê Îmraliyî rê padayê û paşdayîş danê dewamkerdişê tecrîdî.

Heme bajaranê Ewropa de bi şîyarê ‘Ma tecrîdî bişiknê, faşîzmî birijnê û Rayberîye azad bikerê’ ma wareyan de yê. Nê çalakîyan grevê vêşanîye kerd rojdemê dinya. Xeylî nuştox û roşnvîrî zî seba wedaritişê tecrîdî paştdayîş danê.

Heta ke silahîyetdarê dewletanê Ewropa, sazgehê înan û CPT berpirsîyarîya xo bîyarê ca, ma do her Çarşeme vernîya Parlementoyê Ewropa d emîtîng bivirazê. Mîtîngo verên 24’ê Nîsane de do bêro viraştene û ma vengdayîşê tewrbîyayîşêkê xurtî kenê. Ma vengdayîş kenê ke şarê ma yê Almanya, Belçîka, Fransa û Hollanda bi ruhê seferberî û serewedaritişî tewrê mîtîngî bibo.”