Koordînasyonê Weçînayîşî yê Brîtanya seba weçînayîşanê 14ê Gulane xebatê xo zêdînayî. Koordînasyon xeylêk herêman de bi şîarê ''Şar do ser bikewo, faşîzm do bin bikewo'' xebitîyeno û paştî dano Partîya Çep a Keske.

Koordînasyonî wextê xebatan de venga komelanê kurdîstanij û tirkîyayîjan da ke raya xo bidê Partîya Çep a Keske. Xeylêk cayanê bînan ê Londonî de zî standî ronîyayî, vilawekî ameyî vilakerdene.

Koordînasyonê Weçînayîşî yê Brîtanya ra Îbrahîm Avcîlî pare kerd ke vera îdareyê tekkesî yê dişmenî ê seba demokrasî vengê xo azad bikerê. Avcilî vat: ''Seba qedînayîşê sîstemê faşîstî, seba caardişê demokrasîya radîkale raya xo bidê Partîya Çep a Keske.''

Hemsereka Federasyonê Elewîyan a Brîtanya Dîleke Încedal, Meclîsê Şarê Kurdî ra Dogan Genç, Merkezê Kulturê Elewîyan ê Enfieldî ra Fatma Yildirim polat, Merkezê Paştdayîşî yê Alxasîyan ra Olcaye Has û Temsîlkarê Brîtanya yê Konfederasyonê Heqanê Merdiman ê Ewropa Fuat Yoldaşî zî bi eşkerayîyêke paştî daye Partîya Çep a Keske. 

Koordînasyonî da zanayene ke do 4 cayanê Brîtanya de sindoqan bêrê ronayene û weçînitoxî 9 rojan do bieşkê raya xo bidê.