Bi şîarê 'Abdullah Ocalanî rê Azadîye, Meseleya Kurdan rê Çareserîye' mabênê 15-20ê êlule de do şaristanê Bielefeldî yê Almanya ra heta Duisburgî Rayraşîyayîşo Derg do bêro kerdene.

Rayraşîyayîş do 15ê êlule de bi panelê bi nameyê 'Rayber Apo û Ciwanîye' dest pê bikero. Ciwanî do eyaletê NRWyî de mabênê 16 û 20ê êlule de her roje yew bajarî de rayraşîyayîş bikerê. Ciwanê kurd û enternasyonalîstî zî do Bielefeld, Hamm, Dormund, Essen û Duisburrg de semedê azadîya Abdullah Ocalanî kuçeyan de bê.

Komîteya Hazirîye hesabê xo medyaya dîjîtale ra semedê tewrbîyayîşê rayraşîyayîşî veng da. Vengdayîşê bi kirdkî, tirkî, almankî, fransizkî, îtalyankî û îngîlîzkî de derheqê guzergahê rayraşîyayîşî de zî zanayîş ame dayene.

Eşkerayîye de nê ameyî vatene: ''Dewleta tirke ya îşxalkere û rejîmê AKP-MHPyî şexsê Rayberîya ma de vera şarê ma polîtîkaya tecrîd û qirkerdişî rayra beno. Hêrişê îşxal û qirkerdişî yê dewleta tirke Kurdîstan de yenê xorîkerdene. Vera şarê ma şervananê ci yê qehremanan konseptê îmha dewre de yo. Ma sey ciwananê kurdan konseptê îmha nasnêkenê û vera ci têkoşîn kenê. Ma veng danê heme ciwananê kurdan ê ke Ewropa de yê wa bi ruhê seferberîye tewrê rayraşîyayîşê ma bibê.''