Çalakîya grevê vêşanîye ya 14 xoverdayoxanê Strasbourgî kewte 105’ine. Nê 105 rojî yê ke çalakwanî seba wedaritişê tecrîdê serê Rayberê Şarê Kurdî Abdullah Ocalanî grevê vêşanîye yê bêdem û bêagêrayîşî de yê.

Roja Şeme de pisporêkê romatolojî yo ke Swîsre ra amebi muayaneyê çalakwanan kerd. Doktorî çalakwanan ra teyna muayaneyê Gulîstan Îke, Dîlek Ocalane, Nurgul Başarane, Yuksel Koç, Ramazan Îmîr û Kardo Bokanî kerd.Kontrolan ra dima, doktor o ke tim çalakwanan kontrol keno Fahrettîn Gulşenî ra vat, masûlkeyê çalakwanan xeylî helîyayê û no zî hetê weşîya înan ra qesawet dano.

Dr. Gulşenî vat semedê grevê vêşanîye yê demdergî ra masûlkeyî helîyenê û rijîyenê, no semed ra mobikanê xeylî xoverdayoxan rem dayo girewte.Gulşenî ard ziwan pişke û qeseba Yuksel Koçî zî rem girewto û vat, eynî wext de zerrîya ci de zî nêweşîye ameya tespîtkerdene.

Ma nê rîskî girewtî çimanê xo ver

Gulşenî hetê bînî ra vat seba ke çalakwanî tedawî qebûl nêkenê çîyo ke o bikero çin o û vat, çalakwanan doktorî ra vato, “Ma nê rîskî girewtibî çimanê xo ver û dest bi çalakîye kerdibî.”

Yeno pawitene ke siba bi hîrayîye kontrolê çalakwanan ê ke 17’ê Kanûne ra nata grevê vêşanîye de yê, bêro kerdene. Nameyê çalakwanan ê grevê vêşanîye wina yê: Dîlek Ocalane, Nurgul Başarane, Mustafa Sarikaya, Yuksel Koç, Mehmet Nîmet Sevîm, Kardo Bokanî, Agît Ural, Denîz Surgut, Ekrem Yapici, Mohammad Ghaderî, Ramazan Îmîr, Ayvaz Ece û Kerem Solhan.