Musabaqaya Şîîre û Hîkaye ya Huseyîn Çelebîyî ya 27'ine Parîs de ameye viraştene. Musabaqaye bi deqayêkê rêzgirewtişî dest pêkerde.  Ser nameyê YXK/JXK'yî Zade Şengal qisey kerd.

Babîyê Huseyîn Çelebîyî bername de qisey kerd û vat: "Mi sozêk da, heta ke Kurdistan azad nêbo ez do nêmira."

Vervatoxê Jurîyî Kakşar Oremarî zî bale ante serê îşxalkarîya Tirkî ya serê Rojawanî û vat, "Erdogan do serra 2023' de îqtîdar nêbo. Ma do bivînê. Erdogan yewîye û felsefeya ma ra terseno.Kurdan Rojawan de ronesans viraşt. Sûrîye de 500 hezar merdimî merdî. Mîyanê înan de bi hezaran şehîdê ma estê û ma heqê înan zî girewt."

Hemserekê PYD'yî Şahoz Hesenî zî bername de qisey kerd. Hesenî vat ê Sûrîye de seba cuyêka demokratîke têkoşîn danê, na felsefeya xo zî Rayber Abdullah Ocalanî ra gêna. Rojawan de înan rayberîya sîstemêk o pîl kerde û êyê ke verba naye de yê, bi pêroyê hêzê xo hêrişê înan kenê. "Azadîya şarê ma kenê hedef. Ma şerêk kerd û sîstemêk naye ro. Ma do dewamê ci zî bibînê."

Dimayê qiseykerdişan Dîyar Mehrovî deyîrî vatî û xelatê xelatgirewteyan ameyî vilakerdene.

Beşê şîîra Tirkî de Burhan Guneş, Ozan Alpkaya, Senar Abdî, beşê şîîra Kurdî de Nedîme Yaklav, Şakîr Dalkilip û H. Mehmet; beşê şîîra Kirmanckî de Baran Heval, beşê hîkayeyê Tirkî de Zeynî Arat, Îlhamî Çinar û Nûrî Ozen; beşê hîkayeyê Kurmanckî de Ramazan Kiran, Îsa Kaya û Mesut Yurtseverî xelate girewte.

Dima ke xelatgirewteyan xelata xo girewte Yelda Abbasî û Hîvron deyîrî vatî û bername qedîya.