NAV-DEM’î seba ‘weçînitişê PE’ veng da

Merkezê Cimatê Kurdan o Demokratîk ê Almanya (NAV-DEM) veng da weçînitoxanê Kurdan ke weçînitişanê Parlamentoyê Ewropa de raya xo bidê namzedanê azadîperweran.

Weçînitişê Parlamentoyê Ewropa do mabênê tarîxanê 23-26’ê Gulane de bêrê viraştene. Weçînitişan de do 705 endamî goreyê 5 serran bêrê newekerdene.

Almanya bi nufûsa xo ya 83 mîlyonî ke welato tewr pîl ê YE ya, do 96 parlamenteran bieşrawo Parlamentoyê Ewropa.

Lîsteyanê weçînitişî de namzedê Kurdî zî estê. Goreyê doneyanê Heyetê Weçînitişî yê Federalî nizdê 350 hezar Kurdistanijî Almanya de wayîrê heqê raydayîşî yê.

Eşkerayîya NAV-DEM’î de nê ameyî vatene:

“Kurdistanijî çende tewrê weçînitişî bibê, demê vernîya ma de do hende waştişê înan cidî bêrê girewtene. Ganî namzedê şorişgêr, demokrat û averperwer ê Kurdistanijî bêrê paştîdayene.

Heman wextî de eke Kurdistanij nêbê zî çi kesê ke ma bawer kenê do şarê ma bipawê kamcîn miletî ra benê wa bibê, ganî ma kîşta ê namzedan de ca bigêrê. Ma veng danê şarê xo ke raya xo bidê dost şorişgêr û sosyalîstê ke paştî danê mucadeleyê azadîya Kurdan.”

Eşkerayîye de ame vatene ke înan sey NAV-DEM seba weçînitişê Parlamentoyê Eyaletê Bremenî Mazlûm Koç namzed ramoto. NAV-DEM’î vat “Mazlûm Koç Weçînitişê Parlamentoyê Eyaletê Bremenî yo ke do 26’ê Gulane 2019 de bêro viraştene, namzedê Partîya Çepe (Die Linke) yo.”

Peynîya eşkerayîye de no ame vatene, “Ma Kurdî weçînitişan de sîyasetmedaro ciwan Mazlûm Koçî û Partîye Çepe rê paştî danê. Çunke ma bawer kenê ke do Mazlûm Koç bieşko problemanê ma Parlamentoyê Eyaletê Bremenî de bîyaro ziwan.”