Çalakîya bi nameyê ‘Ocalanî rê azadîye’ ya ke 25’ê Hezîran a 2012’î ra nata bajarê Strasbourgî yê Fransa de verê awanîya Konseya Ewropa de dest pêkerde, çalakîya tewr demderge ya heta nikayî ya.

Kurdê bajaranê cîyayan ê Ewropa ra her roje bi dore nobete dewr gênê. Nobetdarê nê hewteyî zî grûba 4 kesan a bajarê Berlînî ya Almanya ya. Kurdistanijanê bi nameyê Îbrahîm Ozsûlar, Serhat Xinisî, Xelîl Çîçek û Zûhatî mîyanê grûbe de ca girewt.

‘Ganî Rojdemo Tekane Xoverdayîşê Hemverê Tecrîdî Bo’

Îbrahîm Ozsûlarî bi nameyê grûbe eşkerayî daye û da zanayene ke nobeta ke nizdê 7 serrî yo seba azadîya Ocalanî dewam kena, heta bireso amacê xo do dewam bikero.

Ozsûlarî bale ante serê rojeyê mergî û grevanê vêşanîye yê bêdem-bêagêrayîşan ê hemverê tecrîdkerdişê Ocalanî û vat, tekane rojdemê şarê Kurdî ganî xoverdayîşê hemverê tecrîdî bo.

Bi Seyan Vilawekî Ameyî Vilakerdene

Çalakwananê ke roja Yewşemeyî nobete dewr girewte do hemeyê hewteyî de çalakîya xo bidomnê. Çalakwanî derheqê vînayîş û cuya Ocalanî de vilawekan vila kenê û sohbet kenê.