Paytextê Fransa û Banlîyoyê Evry dee bi amacê protestokerdişê tecrîdê serê Rayberê Şarê Kurdî Abdullah Ocalanî û baleantişê serê xoverdayîşê grevanê vêşanîye rayraşîyayîşêk ame organîzekerdene.

Rayraşîyayîş Merkezê Kulturê Kurdan o Demokratîk ê Evry ra dest pêkerd û heta vernîya Postaxaneyê Evry dewam kerd.

Rayraşîyayîş de pankarta ‘Ocalanî rê azadîye,’ beyraqê PKK, YPG, YPJ’yî û fotografê Leyla Guvene û çalakwananê grevê vêşanîye yê Strasbourgî ameyî kiriştene.

Vernîya Postaxaneyê Evry de hemserekê Meclîsê Şarî yê Evry Îdrîs Erkekî qisey kerd, bale ante tecrîdê serê Ocalanî û vat, “Ewro 8 hemrayê ma estê ke zîndanan de çalakîya fedaîye viraşta. Leyla Guvene û embazê ma yê ke Strasbourg de yê sînorê mergî de yê. Ganî ma bibê veng û nefesê înan.”

Rayraşîyayîş bi sloganan qedîya.

Parîs De Vernîya Muzeya Louvre De Çalakî

Bi serkêşîya Cinîyê Ciwanî yê Azadî (CJA) yê Kurdistanî cinîyê ciwanî ameyî têhet û vernîya Muzeya Louvre de seba şermezarkerdişê tecrîdê serê Ocalanî û baleantişê serê grevanê vêşanîye çalakîyêk viraştek.

Çalakîye de fotografê 14 çalakwananê grevê vêşanîye yê Strasbourgî û pankarta “Tecrîdî bişiknê, faşîzmî birijnê, Kurdistanî azad bikerê” kiriştî.

Ciwanî dorê muze de bîyî xelqe û bi ziwanê Franskî slogana “Ocalanî rê azadîye” eşte.

Dimayê çalakîya ciwanan ra heta Meydanê Champs Elysee rayra şîyî û çalakîya roniştişî viraşte. Çalaki bi slogana “Biciwîyo Serek Apo” qedîyaye.

Toulouse

Bajarê Fransa Toulouse de zî seba baleantişê serê grevanê vêşanîye û şermezarkerdişê tecrîdê serê Ocalanî rayraşîyayîşêk ame viraştene.

Dimayê deqayêk rêzgirewtişî ra rayraşîyayîşî dest pêkerd û xoverdayoxê grevê vêşanîye ameyî vîrardene.

Rayraşîyayîş bi slogananê “Biciwîyo Serek Apo” û “Cinî, Cuye, Azadî” qedîya.