19ê teşrîna verêne ya 2019î de şaristanê Kolnî yê Almanya de rayberîya xeylêk komanê çepgîran ê Almanya  û rêxistinan de bi şîarê 'Ganî hêrişê îşxalî yê Tirkîya bêrê vindarnayene û paştî bidê Rojawanî' çalakîyêka şermezarkerdişî amebî kerdene.

Labelê çalakîye ra verî di amîranê polîsan ê Mudirîya Asayîşî eşkerayîyê provakatîfî dabî. Amîran îdîa kerd ke kurdî do hêrişê dormeyî bikerê û waşt ke çalakîye bêra qedexekerdene. udirê Asayîşî yê Kolnî Uwe Jacobî û amîrê polîsan ê çalakîye ra mesuldar Klaus Ruschenschmidt 18ê teşrîna verêne ya 2019î de kombîyayîşê çapemenîye de vatbi: ''Goreyê agahîyanê ke ma eşnawitê do nêzdîyê hezar kurdî pê çeke û kardî tewrê çalakîye bibê.''

Dima ke çalakîye bi haştîyane qedîyaye dezgehê bi nameyê Interventionistische Linke (Çepo Têkoşer) tewiro provakatîf ê wird amîranê polîsan berd mehkeme. Dezgehî ard ziwan ke bê delîlî kurdî ameyî hedefkerdene û paştdayîşê bi Rojawanî ame krîmînalîzekerdene.

Dewa 28ê teşrîna verêne ya 2021î de Mehkemeya Îdarî ya Kolnî de dest pêkerde. Heyetê mehkeme bire daye ke eşkerayîyê polîsan dûştê qanûnan ê û semedê îdîayanê înan delîlê qîmî çin ê.

Avûkatanê polîsan îdîa kerd ke polîsan çalakîye ra verî îstîxbaratî ra agahîyî girewtî. Labelê heyetê mehkeme pawitişê înan qîm nêdî.

Eke bira mehkeme bêra caardene pratîk de ceza nêna dayene polîsan la polîsî hînî do nêeşkê eşkerayîya winasênan bidê.