Polîsanê Îngilîzî mudaxeleyê çalakîya ke seba protestokerdişê tecrîdê serê Rayberê Şarê Kurdî Abdullah Ocalanî vizêr ra banê Organîzasyonê Efû yê Mîyanneteweyîyî yê Londra de ameyêne viraştene kerd. Polîsê Îngilîzî yo ke vîst çalakwanê ke banî de bî destbend kerdî, bi zordarîya ke mendêne hêrişê polîsanê Tirkî hêrişê çalakwanan ê Kurdan kerd. 

Çalakîya protestoyî ya ke hetê Meclîsê Cinî yê Rojî, Yewîya Cinîyan a Sosyalîste, Komeleya Kulturî ya Karkeran ê Koçberan (Gîk-Der) û Meclîsê Şarê Kurdî ra bi hawayêkê hemparî ameyêne viraştene, roja Çarşemeyî bi dekewtişê banê Organîzasyonê Efû yê Mîyanneteweyîyî dest pêkerdebî. Pêvînayîşanê ke îdarekaranê Organîzasyonê Efû dir ameybî kerdene înan ra netîceyêk nêamebi girewtene û sere ra hemverê çalakwanan de muameleyê ke teberê merdimîye de bî estbî.

Îdareyê Organîzasyonê Efû yê Mîyanneteweyîyî bişewe saet 01:00 de veng da polîsan û waşt ke çalakwanî banî terk bikerê. Polîsê ke ameyî cayê çalakîye çalakwanan ra waşt ke banî veng kerê, dimayo ke çalakwanan no qebûl nêkerd rastê hêrişê polîsî ameyî. Çalakwanê ke rastê hêrişî ameyî destê înan pey ra ameyî kelemçekerdene û bi nê hawayî ameyî destbendkerdene.

Mîyanê çalakwanan de Nahîde Zengîne û Mehmet Saît Yilmaz zî estbî ke 44 rojî yo grevê vêşanîye yê bêdem û bêagêrayîşî de bî, ê zî rastê hêrişê polîsan ameyî. Nahîde Zengîn a ke halê aye yê weşîye bibi xirab û amîbî berdene nêweşxane, dimayo ke tedawî qebûl nêkerdebî reyna amîbî ardene merkezê Organîzasyonê Efû. Êyê ke ameyî destbendkerdene sere de Barnet ameyî berdene îstasyonanê polîsan ê Londra yê cîyayan.

Meclîsê Şarê Kurdî yê Brîtanya tewirê hemverê çalakîya protestoyî yê Organîzasyonê Efû yê Mîyanneteweyîyî şermezar kerd û nê vatî:

“Organîzasyonê Efû yo Mîyanneteweyî hemverê çalakwananê ke tecrîdî protesto kerdo hîrê rojî tecrîd bica ardo. Berî çalakwanan ser o girewtê, nêverdayo ke ê tuwaletan bişuxulnê û bi nê hawayî adeta çalakwanan rê îşkence kerdo. Ma înan ra waştibi ke derheqê tecrîdê serê Rayberê Şarê Kurdî Abdullah Ocalanî de û halê tepişteyan ê zîndanan de eşkerayîyêk bidê. Organîzasyonê Efû goş nêda nê waştişê ma. Sere de çalakwanî tecrîd kerdî dima ra zî ver bi serê sibayî polîsî dekerdî bîna û musade kerd ke hêrişê çalakwanan bikerê. Ma sey Meclîsê Şarê Kurdî yê Brîtanya nê nizdbîyayîşê teberê exlaqî û merdimîye yê Organîzasyonê Efû yê Mîyanneteweyîyî şermezar kenê. No nizdbîyayîş seba Organîzasyonê Efû lekeyêko sîya yo û ramoto ke ê hetê mezlûman de nê, hetê  zaliman de yê.

Heman wextî de ma hêrişê polîsanê Îngilîzî yo ke hêrişê polîsanê Tirkî ra cîya nêbi zî şermezar kenê. Ê hende merdimîye ra dûrî kewtê ke hêrişê embazanê ma yê ke 44 rojî grevê vêşanîye de bîyê zî kerdo.”