Rayraşîyayîşê 25 rojan o ke bi semedê azadîya fîzîkîye ya Rayberê Şarê Kurdî Abdullah Ocalanî Paris de ame destpêkerdene, roja desine de bajarê Melunî de dewam kerd.

Çalakwanan şar û esnafê derûdorî rê vilawekî vila kerdî. Reyna esnaf û dezgehê fransizan zî ameyî zîyaretkerdene û derheqê rewşa Rayberê Şarê Kurdî Abdullah Ocalanî de dosyayî dîyayî înan.

Çalakwanan verê walîtîye de eşkerayîye daye. Çalakwanan ra Erdal Şahînî derheqê tecrîdê Îmraliyî de qisey kerd û veng da dezgehanê eleqedaran ê Ewropa ke wa vera na bêhuqûqîye bêveng memanê.

Badê rayraşîyayîşî senî ke bajaranê bînan de zî ame kerdene, kartpostalê ke rayîr de ameyî îmzakerdene Rayberê Şarê Kurdî Abdullah Ocalanî rê ameyî şawitene.

Saete 18.00 de do Merkezê Şarî yê Melunî de kombîyayîşê şarî bêro kerdene. Siba do rayraşîyayîş bajarê Evryî de dewam bikero û tîya goştarîkerdişê denbêjan bêrokerdene.