Kurdîstanijan bi vateyê 'Kurdî pê çekanê kîmyewîyan mirenê!' bale ante hêrişanê dewleta tirke ser û bêvengîya Ewropa û rotişê çekan ê bi Tirkîya protesto kerdî.

Kurdîstanijan eyaletê Ren Vestfalya (NRW) ê Almanya de bi rayraşîyayîşêkî dewleta tirke ya îşxalkere protesto kerde ke vera gerîlayan Herêmanê Pawitişî yê Medya de çeka kîmyewîye şuxilnena.

Rayraşîyayîş hetê FED-MED, NRW YJK-E, TÊKO-JIN û Têgêrayîşê Ciwanan ê Şorişgêran (TCŞ) ra ame serûberkerdene. Çalakîkeran kincê sipîyî û maskeyê gazî dayî xo rê û pankartê bi nuşteyê 'Kurdî pê çekanê kîmyewîyan mirenê', 'Vizêr Vietnam, ewro Kurdîstan' akerde.

Çalakîye de nameyê YJK-E ser o Yildize Fîlmcî qisey kerd û vat: ''Dewleta tirke wazena pêro kurdan qir bikera. Vindarnayîşê nê hêrişan destê ma de yê. Ma çend wayîrê na dewa vejîyê, Ewropa û welatê bînî zî do hende wayîrê ci vejîyê.''

Hemserekê FED-MEDî Ahmet Elmasî zî pare kerd ke ê do vera hêrişanê kîmyewîyan xoverdayîşî rê dewam bikerê û venga OPCWyî da ke erkê xo bîyaro ca.