Serkêşîya KOMAWî de seba Salih Cizîrî (Hasan Adir) û Dr. Huseyînî (Selman Bozkûr) Huseyîn ê ke hêrişê hewayî yê dewleta tirke de, 5ê hezîrana 2021î de şehîd bîyî, şaristanê Dortmundî yê Almanya de bi merasîmêkî ameyî yadkerdene.

Sîyasetmedarê kurdî Faysal Sariyildiz, temsîlkarê KON-MEDî, TJK-E, Merkezê Yewîya Komeleyanê Êzidîyan (NAV-YEK), Komelê Îslamî yê Kurdîstanî (CÎK), KCDK-E tewrê merasîmî bîyî. Merasîm pê deqayêkê rêzgirewtişî dest pêkerd. Cinîya Salih Cizîrîyî û embaza ci Suphîye Adir û waya Salih Cizîrîyî Nûşene Îmret  merasîm de qisey kerd.  

Nameyê KOMAWî ser o Alî Konkurdî qisey kerd û vat: ''Şehîdî rûmetê ma yê. Ma do rêçê înan ser de bibê.''

Keyeyê Dr. Huseyînî zî mesajê xo de wina vat: ''Rayîrê ma rayîrê şehîdan o. Ma do pê tewirê şehîdê xo têbigêrê. ''

Hemserekê KCDK-E Yuksel Koçî ard ziwan ke armanco esas ê Salihî azadkerdişê Rayberê Şarê Kurdî bi û o nê rayîrî de şehîd bi.

Endama TJK-E Jînda Pazarcik pare kerd ke ê do sey têgêrayîşê cinîyan dewaya Salihî bivisnê serî.

Dima mesajê Sîyasetmedar Remzî Kartalî û Endamê Konseya Rayberdişî ya KCKyî Zubeyîr Aydarî ame wendene. Mesaj de keyeyanê Salih Cizirî û Dr. Huseyînî ra serweşîye ameye waştene û wina ame vatene: ''Ma soz danê ke bi servistişê têkoşînê azadîye xeyalê şehîdan bîyarê ca.''

Warzeyê Salih Cizîrîyî Çekdar Botanî vat: ''Şehîd Salîh xalê min o la ma tim sey di hemrayan bî. Sînayoxanê ey xîyaneto ke ey rê bi bêcewab nêverda û qesasê ci girewt. Manaya nê têkoşînî ma rê zaf gird a. Ma do semedê heme şehîdanê Zapî têkoşînê înan bidê domnayene.''