Şorişgero enternasyonalîst Ecevît Pîroglu waştişê teslîmkerdişê Tirkîya ser o 24ê hezîrana 2021î de Sirbistan de amebi destbendkerdene. Dosyaya Pîrogluyî de serebûtê neweyî qewimîyayî.

Mehkemeya herêmîye reya hîrêyîne bê roniştişî bire daye ke Ecevît Pîroglu wa bêro teslîmkerdene. Avûkatê Pîrogluyî seba dewa reyna muracatê temyîzî do bikerê.

Pîrogluyo ke vera dîyabi, bi komployê polîsan reyna tepişîya. Roniştişê dewaya Pîrogluyî taloqê 13ê nîsane ame kerdene.

Endamê Meclîsê Parlamenteran ê Ewropa Andrej Hunkoyî zîndan de Pîroglu zîyaret kerd û dima ANFyî rê qisey kerd.

Hunkoyî ard ziwan ke rewşa Pîrogluyî hol a la şertê zîndanî xirab ê. Hunkoyî vat: ''O hucreyê 10 metrekare de, 4 tepişteyanê bînan de maneno. Roje de 2 saetan o eşkeno hucreyî ra vejîyo. Pîroglu goreyê qanûnanê Sirbistanî nêeşkeno serrêke ra zêdeyêr zîndan de tepişte bimano. Coka bi îdîaya sextekarîya belgeyan derheqê ci de dewaya diyîne ameye akerdene.

Ganî Sirbîstan goreyê huqûqê mîyanneteweyî û heqanê merdiman cade ey vera bido. Mi Belgrad de Komîserîya Berze ya Multecîyan a Neteweyanê Yewbîyayeyan zîyaret kerde. Înan sozê paştdayîşî da mi. Ma do nê binpaykerdişanê heqan dezgehanê dîplomatîkan ê Ewropa de bivisnê rojdemî.''