Bajarê Strasbourgî yê Fransa de 1ê kanûne de Înîsîyatîfê Ocalanî rê Azadîye bi şîarê 'Azadîye do ser bikewo-semedê Ocalanî têbigêrê' çalakîye dayebî destpêkerdene. Çalakîya ke çarçewa Hemleya ''Dem Demê Azadîye yo'' de yena kerdene roja 17. de hetê kurdanê ke bajaranê Dusseldorf, Koln, Bielefeld, Dortmund, Essen, Duisburg û Bonnî yê Almanya de ciwinîyene ra ameye dewrgirewtene.

Grûba newîye bi eşkerayîyêke daye eşnawitene ke înan çalakîye dewr girewte. Reyna xeylêk kurdê ke Baselê Swîsre û bajaranê ciya ciyayanê  Almanya ra ameyî ê zî wayîrê çalakîye vejîyayî. Eşkerayîye de bi nameyê FED-MED Almanya û YJK-E  Şevîne Sîncan û Naîf Alkişî qisey kerd. Temsîlkaran veng da CPT û dezgehanê eleqedaran ê Ewropa ke wa tewirê xo yê vera Rayberê Şarê Kurdî Abdullah Ocalanî bibedilnê û vat çalakîyê înan do bêmabên dewam bikerê.

Hemserekê KCDK-E Yukselî Koçî da zanayene ke çalakîya înan a ke di hewteyî yo yena kerdene qedîyaye û vat ê do semedê azadîya Rayberê Şarê Kurdî Abdullah Ocalanî merkezanê cîya cîyayan de çalakîyan organîze bikerê.