Seba paştdayîşê grevê vêşanîye yê seba wadaritişê tecrîdkerdişê Rayberê Şarê Kurdî Abdullah Ocalanî, bajarê Basel ê Swîsre û bajarê Marsîlya û Parîsî yê Fransa de  Kurdistanijî û dostê înan reyna kuçeyan de bî.

Basel: Basel de girse bi vengdayîşê Platformê Paştdayîşê seba Grevê Vêşanîye mîyanê îstasyona trêne ya merkezî de ame têhet û pankarta bi nuşteyê “Vera tecrîdî grevê vêşanîye yê bêdem û bêagêrayîşî de yê” û resimê xoverdayoxan ser o estê akerde. Çalakîye de sloganê “Biciwîyo xoverdayîşê zîndanan”, "Terorîst Tirkîya, qatilkar Erdogan", “Biciwîyo paştdayîşê şorişgerîye” ameyî qîrayene. Girseyî mîyanê îstasyona trene de rayraşîyayîş viraşt, rayraşîyayîşî ra dima dest bi çalakîya roniştişî kerd û vilawekê bi ziwanê Almankî ameyî wendene.

Marsîlya:  Qezaya Marignane ya bajarê Marsîlya yê Fransa de, grubêk ciwanan ra çalakîye viraşte û Yonca Akinci ya ke Hepisxaneyê Tîpê T’yî yê Şakranî yê Îzmîrî de çalakîya fedaîye viraştebî, yad kerde.

Parîs: Paytextê Fransa Parîs de, cinî û ciwanê aktîvîstê Têgêrayîşê Ciwananê Şorişgeran,  bêxemîya selahîyetdaranê Ewropa ya vera grevê vêşanîye bi çalakîye şermezar kerde. Çalakîye meydana Chatelet les Hallesî de ameye viraştene û ciwanan bi girewtişê çim, fek û goşanê xo bêvengîya selahîyetdaranê Ewropa şermezar kerde.Çalakîye de derheqê grevê vêşanîye de qiseykerdişî ameyî kerdene û xeylî vilawekî ameyî vilakerdene.