Tûzak: Bi nê xoverdayîşî ma nefesêk girewt

Mele Mustafa Tûzako ke Berlîn de grevê vêşanîye de yo roja 100’ine ya çalakîya xo de qisey kerd. Tûzakî seba ke mîyanê nê xoverdayîşî de yo keyfweşîya xo arde ziwan û va, ‘Bi nê xoverdayîşî ma nefesêk girewt.‘

Mele Mustafa Tûzako ke paytextê Almanya Berlîn de çalakîya xo ya grevê vêşanîye dano domnayene, roja 100’ine ya çalakîya de bi mesajêk sozê giredayîya xo ya Rayberê Şarê Kurdî Abdullah Ocalan û xoverdayîşî newe kerd.

Tûzakî mesajê xo de nê ardî ziwan: ‘‘Ez zaf şa ya ke mîyanê nê xoverdayîşî de ca gêna. Leyla Guvene ra heta Strasbourg, uca ra heta zîndanan çar leteyê dinya de ma bîyî sey rêxistina xoverdayîşî. Hetê manevîyatî ra ma yewbînan ra hêz genê. Çîyêko ganê mi dejneno hêrişê polîsanê faşîstan ê vera dayîkanê ma yo. No dej zî hîna hêz dano mi. Eke Rayberê ma azad bo zîndan, şar, ma yanî her kes beno azad. Welatê ma zî azad beno. Semedê naye zî ma heme bedelan rê hadre yê. Bedenê ma helîyenê la miheqeq do Kurdistan azad bo. Heme dinya do serkewtişê Kurdan bivîno. Wa her kes bizano ke do şarê Kurdî ser bikewo. Bê Rayberî cuye nêbena.‘‘