Paytextê Belçîka Bruksel de vernîya Parlementoyê Ewropa (PE) de vera tecrîdê serê Rabyerê Şarê Kurdî Abdullah Ocalanî çalakîyêk ameye viraştene. Çalakîye de veng dîya dezgehanê Ewropa ke vera tecrîdî wa bêveng memanê.

Çalakîya ke vernîya Parlementoyê Ewropa de ameye viraştene Almanya, Fransa Hollanda û Belçîka ra xeylî kesî tewrê ci bîyî. Çalakî  hetê Konseya Şarê Kurdî yê Demokratîkî yê Belçîka (NAV-BEL) ra ameye organîzekerdene  û Têgêrayîşê Cînîyan ê Kurdan ê Ewropa,  Yewîya Cinîyan a Sosyalîstan  û rêxistina cimatê sivîlî Hetkarîya Kizile ya Mîyanneteweyîye paştî daye ci.

Çalakîye de hemsereka KCDK-E Fatma Goksugure vist  vîrî ke grevê vêşanîye panc mengan ravêrtî û va: ‘‘Waştişê xoverdayoxan waştişê ma yê. Dezgehê Ewropa ganî bêvengîya xo biqedînê û vera tecrîdî tê bigêrê.‘‘

Hemserekê KONGA GEL’î Remzî Kartalî zî ard ziwan ke ê semedê vengê xoverdayoxan bidê eşnawitene meydanan de yê û va: ‘‘Muhatabê mucadeleyê çalakwananê grevê vêşanîye şarê ma yo. Ganî şar wirzo lingan ser. Hukmatê Ewropa û CPT ganî berpirsîyarîya xo bica bîyarê.‘‘

Bi nameyê NAV-BEL’î zî eşkerayîyêk ame dayene û ame vatene ke vera tecrîdî bêvengmendişê dezgehanê Ewropa  bêberpirsîyarîye ya û ê huqûqê xo binpay kenê.