Paytextê Îngilîstanî yê Londra de, bajaranê Bremen û Hamburgî yê Almanya de, bajarê Grazî yê Awusturya û bajarê Den Haagî yê Hollanda de Merkezê Cimatê Demokratîkî yê Kurdan (NCDK) û Meclîsanê Şarî kongreyê xo yê serraneyî viraştî.

Londra

Merkezê Cimatê Demokratîkî yê Kurdan o ke herêma Harîngeyî ya Londra de, bi tewrbîyayîşê xeylî Kurdistanijan û dostanê înan kongreya xo viraşte. Alî Poyraz, Nahîde Zengîn û Mehmet Saît Yilmazo ke 14’ê Adare ra nata verê tecrîdkerdişê Ocalanî grevê vêşanîye de yê, tewrê kongreye bîyî. Hevmserekê KONGRA-GEL Remzî Kartal zî bi rayîrê Skype tewrê kongre bi û beşdaranê kongre reyde qisey kerd û rewşa peyêne ya sîyasî ya Kurdistanî û Tirkîya ercnaye. Xoverdayoxanê grevê vêşanîye ra Alî Poyrazî bale ante serê muhîmîya xurtkerdişê çalakîyanê vera tecrîdî. Dimayê ercnayîşê rewşa sîyasî û xebatê pratîkî yê serrane, weçînayîş ame kerdene û seba Meclîsê Şarî yê Demokratîkî yê Londrayî 45 kesî ameyî weçînayene. Nejla Arî û Mehmet Kardû zî seba hemserekîye ameyî weçînayene.

Bremen

Bajarê Bremenî yê Almanya de, Komela Bratî e.V. kongreya xo viraşte. Hemserekê NAV-DEM'î Tahîr Koçerî kongre de qisey kerd û bale ante serê xoverdayîşê grevê vêşanîye. Peynîya kongre de rayberîya neweye ameye weçînayene.

Hamburg

Merkezê Cimatê Demokratîkî yê Kurdan ê Hamburgî kongreya xo viraşte. Kongre de rewşa sîyasî ameye ercnayene û  seba meclîsê neweyî  81 kesî ameyî weçînayene.

Graz

Bajarê Grazî yê Awusturya de, bi beşdarbîyayîşê 110 delegeyan  Kongreya 6’ine ya Merkezê Cimatê Demokratîkî yê Kurdan ameye viraştene. Bi nameyê Cimatê Azadîye yê Awusturya Xalîs Severî kongre de qisey kerd û ard ziwan, ganî her kes zêdetir xoverdayoxanê grevê vêşanîye ra wayîr bivejîyo. Peynîya kongre de teba hemserekan 45 kesî seba 9 komîsyonan ameyî weçînayene.

Den Haag

Bajarê Den Haagî yê Hollanda de zî  Merkezê Cimatê Demokratîkî yê Kurdan (NCDK) kongreya xo ya serrane viraşte. Dimayo ke Hemserekê DEM-NED'î Engîn Yûrtseverî rewşa peyêne ya sîyasî ercnaye, meslîso newe ame weçînayene.