Şaristanê Bordeauxî yê Fransa de Bayram Namazo MLKP’yij û Zehra Saglama ke çalakîya fedaîye viraştebî ameyî vîrardene.

BORDEUX

DTKM’yê bajarê Bordeauxî yê Fransa de Bayram Namazo (Baran Serhat) ke Rojawan de amebi qetlkerdene û Zehra Saglama ke seba protestoyê tecrîdî çalakîya fedaîye viraştebî û fermandar Egîd ameyî vîrardene. 

Aktîvîte de fotograf û dîmenê Namaz û Saglame ramojîyayî, ramotişê sînevîzyonî ame kerdene.

Aktîvîte de qiseykerdişo ke bi nameyê MLKP’yî ame kerdene de vajîya Namaz şorişgêrêk bi ke hemverê dişmenî de umîdî gane pêgirewtêne û no vajîya, “Nika Baranê neweyî bi bêsebrî şopa gamanê ê ra dima şinê.”

Vîrardiş de tewr peynî birayo pîl ê Zehra Saglame qisey kerd û vat, “Ma çi rey bin nêkewtî û ma do nêkewê. Çîyê ke kewenê doşanê ma ser ma pîya wedarê û mîrasê şehîdanê xo rê wayîr vejîyê. Ma bibê vengê Zehra, Zulkuf, Medya û Aytene.”

MANNHEIM

DTKM’yê Mannheimî yê Almanya de bi seyan kesî ameyî têhet û şexsê Dogan Arslan, Zulkuf Gezen, Medya Çinare, Umut Acar, Ayten Beçete, Ûgûr Şakar û Zehra Saglame de heme şehîdî bi vîr ardî.

Aktîvîteya vîrardişî de ke peyamî ameyî wendene temsîlkaranê KOMAW’î zî qisey kerd.

Aktîvîteya vîrardişî de derheqê cuya Dogan Arslanî de ramotişêkê sînevîzyonî ame kerdene.

Aktîvîte de grevê vêşanîye yê hemverê tecrîdî ameyî silamkerdene û veng dîya ke çalakîyan rê wayîr bêro vejîyayene.

FLORANSA

Şaristanê Floransa yê Îtalya de zî şerwanê enternasyonalîstî Lorenzo Orsettî (Tekoşer Piling) û Gîovannî Francesco Aspertî (Hîwa Bosco) bi rayraşîyayîşêk ke bi des hezaran kesî tewrê ci bîyî ameyî vîrardene.

Rayraşîyayîş Pîazza Leopoldo ra ke Lorenzo Orsettî ûca ciwîyayêne ra dest pêkerd û Parkê Fortezza de qedîya. 

Rayraşîyayîş bi serkêşîya Komîneta Kurdoyî ame organîzekerdene, tede nizdîyê 30 sazîyanê sivîlan ê cimatî yê çep, sosyalîst, komunîst û femînîstan zî ca girewt. 

Maya, pîyê û bira û wayê Lorenzo Orsettîyî zî tewrê rayraşîyayîşî bîyî.

Maye û pîyê Lorenzoyî qiseykerdişê xo de vat, “Ma bi şehîd Tekoşerî serberz ê. Sereyê ma berz o, ma bi lajê xo şa yê, çunke o nê mucadeleyê heqdarî de şehîd kewt.”

Vîrardiş de peyamê YPG û YPJ’yî zî ameyî wendene, xeylî temsîlkaranê sazîyan zî qisey kerd.

Qiseykerdişan de tecrîdo mutleq ê serê Rayberê Şarê Kurdî Abdullah Ocalanî ame protestokerdene, xoverdayoxê grevê vêşanîye ameyî silamkerdene.

TORÎNO

Şerwanê ke Rojawan de şehîd kewtîbî şaristanê Torîno yê Îtalya de ameyî vîrardene.

Şaristanê Torîno yê Îtalya de Kurdan û dostanê înan Gîovannî Hîwa Bosco û Lorenzo Orso Tekoşerî yê ke Rojawan de şehîd kewtîbî bi vîr ardî.

Vîrardişo ke seba şehîdanê şorişî bi rêzgirewtişî dest pêkerd de hetê Devîde Grasso û Jacopo Bîndî ra qiseykerdişêk ame kerdene. Qiseykerdişan de peyamê do vîrameyîşê şehîdan rê wayîr bêro vetene ameyî dayene.

BASEL

Şaristanê Baselî yê Swîsre de zî kesê ke Mucadeleyê Azadîya Kurdistanî û Mucadeleyê Şorişê Tirkîya de şehîd kewtê bi 2 aktîvîteyan ameyî vîrardene. Hetê Komîsyonê Keyeyanê Şehîdan ra Merkezê Cimatê Kurdan o Demokratîk (DTKM) de bi wesîleya Hewteyê Qehremanîye sere de şehîdê Adare seba şerwano enternasyonalîst o Îtalyan şehîd Lorenzo Tekoşer Orsettî, seba şehîdanê çalakîya fedaîye Umît Acar, Medya Çinare, Zehra Saglame, Ayten Beçete, Zulkuf Gezen, Ûgûr Şakar, Baran Serhatî û seba gerîlayan Kenan Koçlu (Adil Axpik), Rahşan Şene (Rewşen Antepe), Yusuf Ozbey (Kamîl Şirnak), Mehmet Salîh Buyukertaş (Şervan Amara), Alî Buyukertaş (Andok Urfa) ke Wareyê Pawitişî yê Medya de şehîd kewtîbî yew aktîvîteya vîrardişî amî organîzekerdene.  

Vîrardişo ke merdimê şehîdan, Kurdistanijî û şorişgêrî Tirkîyayijî tewrê ci bîyî de hetê Komîsyonê Keyeyanê Şehîdan ra qiseykerdişê akerdişî ame kerdene, dima ra bi sînevîzyonan cuya şehîdan ra tayê leteyî ameyî neqlkerdene.

Basel de vîrardişêko bîn zî seba endamê Komîteya Merkezî ya MLKP’yî Bayram Namazo (Baran Serhat) ke Serêkanîye de hetê dewleta Tirkî û çeteyanê ci ra bi sûyîqest ame kiştene ame organîzekerdene. Bi seyan kesî tewrê vîrardişo ke hetê MLKP Swîsre, Young Struggle û Yewîya Cinîyan ê Sosyalîstan (SKB) ame organîzekerdene bîyî.

SAARBRUCKEN

Şaristanê Saarbrücken ê Almanya de Bayram Namaz bi aktîvîteyêk ame vîrardene. Aktîvîteya ke bi serkêşîya MLKP’yî DTKM’yê Saarbruckenî de amî viraştene rê xeylî Kurdistanij û dostê înan tewrê ci bîyî. Vîrardiş de hîkayeya cuye ya Bayram Namazî û raywanîya ê ya şorişî bi sînevîzyonêk ameyî ramotene. Dimayê qiseykerdişanê Zero Tosun û Dexîl Îbrahîmî ra aktîvîte bi slogananê “şehîdî nêmirenê” qedîyaye.

NIJMEGEN

Şaristanê Nijmegen ê Hollanda de zî aktîvîteya Hewteyê Qehremanîye amî organîzekerdene.

Sere de keyeyê şehîdan xeylî Kurdistanijî tewrê aktîvîte bîyî, aktîvîte bi marşê “Ey Reqîbî” û rêzgirewtişî dest pêkerde.

Vîrardiş de serê nameyê Temsîlkarîya KOMAW’ê Hollanda de Mehmet Zengînî qisey kerd û qiseykerdiş de bale ante muhîmîya hewteyê qehremanîye ser.

Vîrardişî bi ramotişê sînevîzyonêk ke seba Mazlûm Dogan û Mahsûm Korkmazî (Egîd) amebi amadekerdene dewam kerd, dima ra serê nameyê Ciwaka Azadî de qiseykerdişêk ame kerdene.

Vîrardiş de hunermend Loqman Dilwarî zî sehne de ca girewt.

Vîrardiş bi dayîşê werî qedîya.