Kurdistanijan ê ke vera tecrîdkerdişê Rayberê Şarê Kurdî Abdullah Ocalanî vizêrî paytextê Swêdî Stockholm de dest bi grevê vêşanîye kerdbi, verê banê Wezaretê Karê Teberî yê Swêdî de çalakîyêk viraşte.
Çalakwanan pankarta bi nuşteyê “Paştdayîş bidê çalakwananê grevê vêşanîye, tecrîd biqedîyo û CPT bikewo mîyanê têgêrayîşî” teba dowîzê ke amblemê HDP'yî ser o yê akerdî û selahîyetdaranê Wezaretê Karê Teberî ra waştişê pêvînayîşî kerd.
Bi nameyê Wezaretîya Karê Teberî di selahîyetdaran pêşwazîya çalakwanan kerde û ard ziwan ke ê rewşa Tirkîya ra qesawet de yê û çalakîya grevê vêşanîye nêzdî ra teqîp kenê.
Endama Heyetê Rayberîya Meslîsê Cinîyan ê Kurdan ê Amara Nujen Ahmede bi nameyê çalakwanan selahîyetdaranê Wezaretê Karê Teberî de qisey kerd û derheqê tecrîdkerdişê Rayberê Şarê Kurdî Abdullah Ocalanî de zanayîşî dayî.
Ahmede ard vîrî, Leyla Guvene 7'ê Teşrîna Peyêne ra nata grevê vêşanîye de ya, teba çalakwananê bînan ê grevê vêşanîye seba ke ciwîyayîşê xo dewam bikerê xo ver ro danê û Swêd ra waşt, seba wedaritişê tecrîdî bikewê mîyanê têgêrayîşî û na babete bikewê rojdemê Yewîya Ewropa.
Çalakwanan ra Latîfe Fegan û Gaffûr Mûhammedî ANF’yî rê qisey kerd û da zanayene ke seba wedaritişê tecrîdkerdişê Ocalanî ê do heta peynîye têkoşîn bikerê û Swêdî de pêvînayîşanê xo yê derheqê na babete dewam bikerê.
