Rayberê Şarê Kurdî Abdullah Ocalan wexto ke Îtalya de mendêne pêro kurdan bala xo dabi nê welatî ser. Kurdî û dostê înan Ewropa ra şîyêne Îtalya, verê nêweşxaneyê Meydanê Celioyî de ameyêne pêser ke Rayberê xo têna nêverdê. Dima nameyê nê meydanî vurîya bi ''Piazza Kurdistan''. Kurdî her roje wina hesibnayêne ke Rayberê înan ê nêweşxane de yo û verê nêweşxaneyî de bi vatişê 'Rojbaş Serekê mi' şîyar bîyêne.

Komployo ke 9ê teşrîna verêne de dîyabi destpêkerdene pêro welatperwer û şorişgêran hêrs kerdbi. Sere de zîndananê Kurdîstan û Tirkîya de pêro dinya de kurdan vatêne 'Şima nêeşkenê tîja ma tarî bikerê' û bedenê xo dayêne adirî ver. Reya verêne şewa 9ê teşrîna verêne de Gumgum de tepişte M. Halît Oralî bedenê xo da adirî ver. Oral qezaya Omeryanî ya Mêrdînî de amebi dinya. Oral wexto ke seba şîyayîşê koyan amadekarî kerdêne bibi esîrê dewleta tirke.

M. Halît Oralî mektubê xo yê seba Ocalanî de wina vatêne: ''Bêguman dewleta tirke çalakîya mi ra dima zî gamêke apey nêerzena la ê do bivînê ke eke zerarêko qij zî bireso to şarê ma do dinya seba înan bikerê zîndan. Çunke ewro pêro dinya qala ma kena û no netîceya ked û xîretê şima ya.''

Zîndanê Bartinî de 18ê teşrîna verêne ya 1998î de Murat Kaya, Zîndanê Amasya de 19ê teşrîna verêne de Mehmet Gulî bedenê xo dayî adirî ver. Rojanê Roma yê Ocalanî de têna kadroyê PKKyî nê pêro welatperweranê kurdan çalakîya xovêşnayîşî kerdêne.

Vengdayîş: 'Bedenê xo mede adirî ver'

Rojanê Roma de şorişgêranê PKKyî yê bi nameyê Remzî Akkuş (Jêhat) û Ahmet Yildirim (Tayhan) 17ê teşrîna peyêne ya 1998î de paytextê Rûsya Moskova de verê parlamento de hewayêkê zaf serdinî de bi sloganê 'Biciwîyo Serek Apo' bedenê xo dayî adirî ver. Çalakîyê xovêşnayîşî her roje zêdîyayêne. Rayberê Şarê Kurdî nê rojan de mudaxele kerd û 19ê teşrîna peyêne de eşkerayîyêka winasêne daye: ''Paştdayîş û perwerîya seba ma bêguman heta ke rewşa ma eşkera biba do dewam bikerê. Çunke oyo esas şexsê ma nê ameyoxê ma yo azad o, qederê ma yo. Têkoşînê ma do dewam bikero. Ma do sey mexdûranê terorî, heta ke teror biqedînê nêvinderê. La ma do çalakîyanê ke zor danê ma, nêkerê.

Rojanê peyênan de çalakîyê xovêşnayîşî dewam kenê. Tewr peyêne zîndanan de 8, Rûsya de 2, Almanya de yew û ewro zî Roma de embazêkê ma yê ercîyayeyî bedenê xo dayî adirî ver. Ez bi wesîleya çalakîya Roma reyna venga şima dana ke cade çalakîya xovêşnayîşî biqednê.

Ez selam kena na perwerî û çêrîye la êyê ke raşta zî perwerê ma yê ganî hînî çalakîya winasêne nêkerê. Ez her hetî ra weş a. Qerardarîya şima mi geş kena û mujdeyê azadîye dana. Nê esasî ser o ez pê bawer a ke nê çalakîyî do biqedê. Ez zerrî ra selam kena şima û heskerdişê xo pêşkêşê şima kena.''

Konferanso mîyanneteweyî yan zî pawitişê mehkeme

Rixmê vengdayîşê Abdullah Ocalanî çalakîyanê xovêşnayîşî dewam kerd. Kurdî seba ke weşîya Rayberê înan bigêrîyo binê garantî û Îtalya ey qebul bikera her roje vejîyayêne meydanan. Roma ra heta London, Amsterdamî ra heta Atina, Berlinî ra heta Stockholm, Silêmanî ra heta Tehran kurdan nawnayîş û çalakîyê xovêşnayîşî kerdêne.

Qiseykerdişê Roma

Rayberê Şarê Kurdî wexto ke şibi Îtalya eşkerayîya xo ya verêne de wina vatbi: ''Ma prosesêkê haştîyane wazenê û no seba çareserîya polîtîke ya na mesele girîng a.'' Ocalanî 12ê terşîna peyêne ya 1998î û dima zî seba çareserîya meseleya kurdan eşkerayîyê tarîxîyî dayî. Dima nameyê 'Qiseykerişanê Roma' dîya nê eşkerayîya. Nê qiseykerdişî têna medyaya kurdan de nê medyaya dinya de bîyêne rojdem. Her qiseykerdiş û roportajê Rayberê Şarê Kurdî Ewropa de bîyêne rojdem.

Rojanê peyênan ê serra 1998î de Rayberê Şarê Kurdî ajansê xeberan ê Reutersî rê roportajêk da û no roporaj wina bi manşet: ''Ez amade ya ke welatêkê edîl û bêterefî de bêra humkerdene. No welat Hollanda, Avusturya, Îspanya zî beno welatêko bîn ê Ewropa zî beno.''

Ê rojan de Ewropa de seba amadekarîya mehkemeyêke amadekarîye ameyêne kerdene. Na mehkeme de do berê çareserîya meseleya kurdan biamayêne akerdene û sûcê şerî yê Kurdîstanî do bibîyêne rojdem. La Îdareyê DYA zî seba ke eyar bido prosesê komployî  kewt dewre.

Serekê DYA kewt dewre

Wezîra Karanê Teberî yê DYA Madeleine Albright, 21ê teşrîna peyêne ya 1998î de seba ke Rayberê Şarê Kurdî nêro berdene welatêkê bînî û 'sûcanê' xo ra bêro hukmkerdene wekîlê bi nameyê Strobe Talbott erşawit Roma. Tedaya DYA ra dima Îtalya zî pêşnîyaz kerd ke Ocalan bierşawa Lîbya. La DYA îdîa kerd ke Lîbyaya Kaddafîyî 'bêkontrol' a û Tirkîya û Almanya nîşan kerdêne. La 27ê teşrîna peyêne de Serekwezîrê Almanya Schroderî vat 'Ma Ocalan nêwazenê.' Bi nê hawayî destê Îtalya zî bîyêne teng.

D'Alemayî serra 2003î de roportajê xo de derheqê tewirê DYA de wina vatêne: ''Tirkîya vera ma rê nota erşawitêne, ma zî gêrayêne yew çareya ci. O çax Serekê DYA Bill Clinton kewt dewre. Ey mi rê telefon kerd û vat: 'Ocalan terorîst o, ey bide Tirkîya.' Mi zî tira vat çîyo winasên mumkîn nîyo û eke wina bo Tirkîya do ey darde bikera. Mi vist vîrî de verî zî seba ke Tirkîya de cezaya dardekerdişî esta DYA kesêk nêda Tirkîya. La Clinton îqna nêbi.''

'Beno ke ez bin kewta la şima ser kewtî'

Rayberê Şarê Kurdî pê hesîya ke hêzê komplogerî vera hukmatê D'alemayî tedaya xo kenê zêdêr û nê pêroyî dewamê 9ê teşrîna verêne yê. Coka 25ê kanûna 1998î de Rayberê Şarê Kurdî eşkerayîya winasêne daye: ''Komployê 9ê Teşrîna Verêne de MED TV ame tarîkerdene. A roje ez hema teyara de bîya. No tarîkerdiş mojneno ke no kar plankerde yo. 9ê teşrîna verêne ra nata pêro Interpol gêreno mi. No zî mojneno ke murtecîyê dinya vera ma têgêrenê. Seba ke ma rewşa ewroyîne fam bikerê nê çîyî bes ê.

Tewirê Primakovî û tewirê Simitisî seba ke ma rewşa ewroyîne fam bikerê bes ê. Birêz D'Alemayî seba ke demokrat bi tay gamî eştî la wextêkê kilmî de vengê ci ame birnayene. Seba ke ez wazena teror vindarna wina kenê. Xeylêk rojnamegerî zî pê naye hesîyayî. Mi rê vanê 'Ti sey bombaya haştîye varenî.'

Nika ê tarîye de şer kenê, planê înan nimite yê û bi israrî wazenê nê planan bîyarê ca. Ez do nê têgêrayîşê haştîye bida dewamkerdene. Beno ke no seba Ewropa hîna hol o. Mi vatbi ke menfaatê Ewropa bi haştîye visîyeno dest. La ê qestî ra vatişê mi kenê çewt. Qaşo ê do destpêkê serre ra verî çîyêk bikerê. La heta ê wextî se beno se nêbeno. Birêze Mitterande qiyam nano ro û vano 'Verê îradeyê polîtîkî yê Ewropa de hesteyê mêrdeyê mi dejenê.' La çew pê vatişê aye tênêgêreno!

Hetê bînî ra ê do hema fuze û bombayan bivarnê. Gama ma ya haştîye gamêka musbete bibî. Nêbo ma ganî Ewropa de nê gaman bimojnê. Almanya vana 'Ez do destpêkê serre ra dima do têbigêra.' Fuzeyî merdiman kişenê. Çira destpêkê serre pawenê? Ganî ê cade bi qerardarî têbigêrê. Eke ez bimayêne beno ke hetkarîya ma resayêne haştîye. Mi û tay dostan seba naye waştêne ke Ewropa de bimana.

Ez do seba haştîye isrardar biba. Haştîye manadar a. Aslê xo de her kes naye zaneno û seba naye wazeno xîret bikero. Tirkîya de şovenîzm zêdîya û seke felsefeya barbarîye visîyaye dewre. Êyê ke qerarê şerî dayo, tersenê. Tersê Tirkîya şovenîzm zêdîneno. Tay kesî wazenê ke binê tarîtîye de karê xo safî bikerê. Tirkîya de cergê şerî, cergê rantî wina kenê. Ganî şarê Tirkîya naye hol bizanê. Bi na wesîle ez şarê kurdî rê vana ke; beno ke ez bin kewta la şima ser kewtî. La seba ke no serkewtiş bibo raştikên ganî şima biaqil bibê û bizanê ke senî têbigêrê.''

Seba vejîyayîşê neweyî tay xîretî

Rixmê nê vatişanê Ocalanî zî hêzanê komplogeran planê xo ra fek vera nêda. Ê rojan de Ocalan merkezê Roma ra 20 kîlometreyan ra dûr de mabênê Ostia û Casaltalocaa de keyeyêkê bi nameyê Villettta Color Ocro (Vîllaya bi rengê fîrketan) de mendêne. Ocalan binê asayîşê hêzanê taybetan ê Îtalya de bi. Kesê ke şîyêne keye ameyêne kontrolkerdene, kuçe binê ablûqaya polîsan de bi, serê banan de nêçîrwanî estbî. Heta Ocalan ge ge zereyê keyeyî de zî çaketo çelikîn xo rê dayêne. Çunke Îtalya wextêk merkezê Gladioyî bîye.

Hem welatanê Ewropa hukmatê D'Alema têna verdabi hem zî tedaya psîkolojîke kerdêne ke Ocalan rojanê verênan ê serra newîye de vejîyayîşêkê neweyî bivîno. Rayberê Şarê Kurdî Abdullah Ocalanî derheqê tewirê hukmatê Roma de dima wina vatbi: ''Tewirê Serekwezîr Massimı D'Alemayî durist bi la qîm nêkerdêne. O nêeşkabi temînatêkê sîyasîyî bido mi. D'Alemayî rewşa ma verdaye hukmkerdişî. Ez naye ra hêrs bîya. Mi bire daye ke firsendêk bivîna û Îtalya ra vejîya. D'Alema roportajê xo yê peyênî de vatbi ke ez çendek biwaza eşkena Îtalya de bimana. La mi ra wina ame ke zerrî ra nêvatêne.''

Seba welatêkê bînî xîretê Îtalya û dîplomasîya kurdan qîm nêkerdêne. Fransa, Fînlandîya, Avusturya, Yunanîstan, Çekya, Afrîkaya Başûre û Norweçî îfade kerdêne ke ê Ocalan nêwazenê. Fînlandîya vatêne eke Fransa û Almanya tesdîq bikerê Ocalan eşkeno şoro welatê înan. Dima ke Ocalanî Nelson Mandela û Desmond Tutuyî rê mektubî erşawitî Afrîkaya Başûre berê xo akerbi. La ê rojan de Serekwezîrê Îngilîstanî Tony Blair do bişîyêne uca. Seba ke hêzê globalî hêrs nêbê Afrîkaya Başûre na bire ra fek vera daye.

Berê sînorî û warê hewayî Rayberê Şarê Kurdî rê qefilîyayî û muracatê ey ê seba bextwaştişî bêcewab mendî. Ocalanî 7ê kanûna 1998î de roportajêk da Ozgur Politika û derheqê mesele de wina vat: ''Têkoşînê min ê seba heqanê demokrat-neteweyîyan ê merdiman zanîyeno. Ewropa kurdan rê heqê bextwaştişê sîyasîyî dana. La eke babete ez biba hetê polîtîkî ra qerqilîyena. Nê qewimîyayîşê ke Ewropa semedê înan ra statuyê polîtîkî dana kurdan, hetê mi ra ameyî kerdene. Ez tîya de wazena bale bianca paradoksêkê ecêbî ser. Ê rayberê bînî yê kurdan pêro wayîrê pasaportî yê la pasaportê mi çin o. Çunke ez bin nêkewta. Seba înan no sûc o. Ez hêvî kena ke huqûq do naye bivîno û bi nê hawayî bira xo bido. Ê vanê 'wa sere şoro ma do bedenê ci parçe bikerê.' No tewir barbarî yo. Îtalya bi hawayêkê bêhukmî înfaz nêkerd û do nêkera.''