Keyeyê kurdan bi fotografanê gerîla û şehîdan xemilnaye yê. Ciwanê ke semedê azadîya erd û şarê xo cuya xo feda kenê hînî  zafêr delalîyê keye û welatê xo yê. Coka dêsê keyeyê înan de fotografê înan yenê daliqnayene. Keyeyî hesretê qijanê xo ra dejo pîl biancê zî pê înan sereberz ê. Xort û kênayê kurdan ê delalê ke hînî têna heskerdeyê merdimanê xo nê hetê heme welatî ra yenê heskerdene gama ke têkoşînê estbîyayîşî de benê bêmerg zafê înan ''Goristanê Bêksanî'' de yenê definkerdene ke sey bêqîymet bêrê ramojnayene.

Dewleta ke bêhurmetîya vera cenazayan de sînor nas nêkena, tarîxî ra sey ganîyan vera merdeyanê kurdan zî şer kena ke merde û ganîyan cêser bifîno. Goristanî rijnayî, merdeyî kuçeyan de bi rojan verdayî, meyîtan rê îşkence kerd, esteyê merdeyan goran ra vetî çi ke dest ra yeno kerd û kenê. Gerîlayî û sîvîlê ke bi destê înan yenê kiştene rixmo ke keyeyê înan semedê girewtişê cenazayanê xo gelç vejenê, ''Goristanê Bêkesan'' de yenê definkerdene.

Qicê tîje ke 'Goristanê Bêkesan' de yenê definkerdene bêkes nê sînayeyê welatê xo yê,

Cîgera dayîkan, roşnayîya çimanê babîyanê xo yê,

Hesretê wayûbirayan, heskerdişê waştîyanê xo yê,

Hêvîya qicanê xo ameyoxê Kurdîstanî yê,

Sanikê tarîxî yê pîrikanê xo, rengê cuya azad ê,

Vilika wisarî, boya azadîye yê,

Germayîya hemrayanê xo, qehremanê şarê kurdî yê,

Xoverdayoxê Kurdîstanî ruhê xoverdayîşî, sînayeyê welatî yê bêmerg ê...

Heme şaran û îtîqatan de rituele definkerdişê meyîtî estê. Tay vêşnenê û wella ci vay danê û tay defin kenê. Bi tewiranê cîya cîyayan zî  bo her komel goreyê tradîsyonê xo meyîtanê xo na dinya ra keno raşt. Kurdîstan de zî goreyê îtîqatan merasîmê oxirkerdişî yenê kerdene û heta ke meyît nêro wedaritene demê sîyagiredayîşî nêqedîyeno. Seba ke gorê merdayanê înan çîn o, dejê keyeyan dilab-hîrlab zêdîyeno.

Cenaza rê hurmet erjanê tewr muhîman ê îslamî ra yew o. Dewlete binê nameyê “terorîst” î de heme nasanmeyanê bînan ê cenazayanê kurdan kena nevîyartbar û  wazena şehîdanê kurdan vîrê komelî ra biestero. La xora Şêx Seîd û Seyîd Rizayan ra yeno zanayene ke gorê înan çînêbî zî xoverdayoxê kurdan mezg û zerrîya şarê kurdî de tim ciwîyenê. Êyê ke wazenê merdeyanê ci serî ra îradeyê kurdan teslîm bîgerê vînenê ke ê çend mirênenî têgarayîşê azadîye pîlêr beno. Hêrişê çînkerdişê dewlete erdê Kurdîstanî de sey ganîbîyayîşî zîl dano. No zî înan keno gej ke vera merdeyanê xoverdayox û serwedartoxan metodanê neweyan fînenê dewre.

Dewlete wazena ke kurdanê ke mirênena vîrê şarî ra zî vejo û bêmana û bêerj bikero la kurdê ke şehîdanê xo rê estbîyayîşê xo deyndarê  zanê ke vîrakerdiş xîyanet o û şehîdanê xo danê ciwîyayene. Gorê ci bibo ya zî mebo no tiway nêbedilneno. Êyê ke yenê mirênayene, îşkencekerdene û sey bêkesan yenê definkerdene, zerrîya şarê xo de sey sembolê azadîye cayê xo yê bêmergî genê. Reyna keyeyê şehîdan zî sey keyeyê erjî yenê namekerdene. Cenazayanê xoverdayoxanê kurdan de hînî herinda bermayîşî de lawikê xoverdayîşî yenê vatene û mergê polîtîkî sey newe ra estbîyayîşî  yenê hesibnayene. Coka xoverdayîşê şarê kurdî ra qurfê dewlete kewta.

Adirê zerrîya dayîkanê ke destê înan de fotografê qicanê ci gêrenê cenazayanê xo, kilaya ci do rojêke bireso zulmkaran û înan bivêşno bikero tar.